Ua fa'ailoa i le afiafi nei i se pepa o faamatalaga i luga o le facebook a le Matāgaluega o Leoleo ma le Ola Toefuataina, le talosaga i le atunuu ona o le sailia ai o se tasi o alii ua masalomia o loo aafia i se faalavelave na tulai mai i le vaiaso ua tuanai.
E le'o māua tonu po'o fea se nofoaga o iai lenei taule'ale'a ma olea ua talosagaina ai e le Matāgaluega le fesoasoani a le atunuu.
I le pepa o faamatalaga o loo faapea mai:
"Ua talosagaina e le Matagaluega o Leoleo, Falepuipui & Toefuataiga i le mamalu o le atunuu mo ni faamatalaga i se alii o lo’o tau sailia nei e Leoleo e pei ona iai le ata ua tuuina atu mo le silafia:
O loo tau sailia e Leoleo lenei alii e tusa ai o se suesuega o lo o faagasolo nei i se mataupu na maliu ai se tasi, e tusa ai o se faalavelave na lipotia mai i le vaiaso na te’a nei.
Ua fautuaina le mamalu o le atunu’u ina ia fa’afeso’ota’i vave le Matagaluega pe fa’ailoa ifo i so’o se Ofisa o Leoleo e latalata ane mo so’o se va’aiga o lenei tagata ona o loo masalomia o loo fa’aaupegaina ma e le tatau ona faalatalata iai se tasi.
E toe faamanatu atu i le mamalu o le atunuu, o se soligatulafono pe a e fesoasoani e faalafi lenei tagata o loo sailia e Leoleo.
Fa'amolemole faafesootai mai le numera o le telefoni 22222 pe faailoa ifo i se Ofisa Leoleo o latalata ane ni faamatalaga e ono fesoasoani i le saisaia mai o lenei tagata.
E fautua atu foi i lenei alii o loo sailia ina ia sau i totonu pe lipoti ifo i se Ofisa o Leoleo lata ane.
Galulue fa'atasi mo se Samoa saogalemu."
Comments