top of page

Savalia e le Matagaluega o Leoleo le nu'u o Le'auva'a mo le momoliina o le savali o le filemu i fevesia'iga o lo'o tula'i mai.


O le aso ananafi, sa fa’ataunuuina ai se feiloaiga a le Matagaluega o Leoleo, Falepuipui ma le Toefuataiga ma le Pulega a Alii ma Faipule o Leauvaa e tusa ai o le mataupu i fevesiaiga a tupulaga talavou a Afega ma Leauva’a ma le iuga o le fa’amasinoga o Fanua ma Suafa e pei ona iai galuega sa amatalia mai le fa’aiuga o le tausaga na tea nei.


I le pepa o fa'amatalaga a le Matagaluega o Leoleo o ta'ua ai, o le afuaga o le savali a le Matagaluega i Le'auva'a ina fa'atalanoaina mata'upu o tula'i mai ma fa'ao'o atu se savali aua le filemu.


"O le savali a le Matagaluega i le alalafaga o Leauva’a o le fa’atumauina lea o le filemu ma le saogalemu lautele o tatou tagata".


Ua savali i le 3 masina o iai ni fese'esea'iga i totonu o le nuu o Leauva'a ma Afega e aofia ma ni isi o vaega o Sale'imoa e pei o Levi ma Alamutu.


"O le auva’a a le Matagaluega sa taitaia e le Komesina Lagolago ia Leausalilo Norman Meni ma sui sinia o le vaega o Galuega Soosootauau ma le Atunuu (Community Engagement Unit).

O le tootoo lauga ia Tevaga Vailua sa fai ma sui o le afioaga e talia le savali a le Matagaluega ma ia saunoa foi i le fa’atāua o le fa’atūmauina o le filemu ma le saogalemu o tatou tagata".


Ua momoli ai fo'i le fa'afetai a le Matagaluega i le lagolago o le pulega a alii ma faipule o le itumalo e ala i le tausia pea o le filemu.


2,691 views
bottom of page