top of page

Siamupini le Kolisi o Amoa i le taamilosaga lakapī a Kolisi Maualuluga mo le uluai taimi.




O le aso Faraile o le vaiaso na mavae atu nei, aso 26 o le masina o Aperila, sa taualuga ai ta’amilosaga lakapi 15 a kolisi Maualuluga uma o Samoa i sailiga siamupini o vaega ta’itasi i le itupā o tama’ita’i fa’apea ai ma ali’i, ae o le ta’aloga autū sa tulimata’i e le to’atele o le ta’aloga i le va o le kolisi o Amoa ma le kolisi o Sagatao Iosefo i Alafua.


Sa fa’atumulia le malae o le Kolisi o Sagato Iosefo i le toatele o tagata lagolago ma le au matamata i ta'aloga a le fanau, o nisi o kolisi mai Savai’i sa masi’i mamao mai lava le tapuaiga a matua ma aiga e tapuaia ma patipatia le fa’amoemoe sa masi’i mamao mai ai.


O se tausaga uiga ese lenei i ta’aloga lakapi a kolisi o Samoa o le sailia ai ese kolisi mai Savai’i ma le kolisi i Upolu o le siamupini o siamupini o lenei ta’amilosaga e pei ona iai Amoa ma Sagato Iosefo. 


O le tele lava o tausaga e toe saili lava e kolisi i Upolu nei le saiamupini o lenei fa’amoemoe e pei ona iai le tausaga ua mavae lea sa saili ai e le kolisi o Pesega ma le kolisi o Nuuausala le siamupini ma na manumalo ai Pesega.


O le tausaga lenei ua fa’amauina i le tala fa’asolopito o ta’amilosaga lakapi a kolisi o Samoa le numera tasi ai o le kolisi o Amoa ina ua latou manumalo i le sailiga simaupini sa ta’aalo ai ma le kolisi o Sagato Iosefo i ‘ai e 18 i le 17.


Na maitauina i ata pueina i luga o upega tafailagi le sagisagi fiafia mai o le motu tele i le fa’ataliga o le taunu’u atu ai o le siamupini o ta’aloga lakapi a kolisi o Samoa i le uafu i Salelologa, o nisi ua na’o loimata maligi o le fiafia ma le faamomoi loto pe a toe to manatu i le masi’i mamao atu ai mai i Savai’i aga’i i Upolu ma ta’aalo ai i le nofoaga sa tapuvaetasi iai ta’aloga a le fanau.


Comments


bottom of page