23 Ianuari 2023.
“E au le ina'ilau a tama'ita'i." o se alaga'upu e fa'amatalaina ai se tulaga maualuga e mafai ona ausia e se tama'ita'i i lo tatou atunu'u.
O se tasi lenei mata'upu e talafeauga lelei ma se tulaga mata'utia ua maua e ni isi o alo talavou a Samoa i le ta'aloga o le lakapi i le Lalolagi.
O le tama'itai o Saelua Leaula o lenei ua fa'amanuiaina i se avanoa fa'asikolasipi e ta'alo ai mo le 'au lakapi a Ausetalia o le Western Force i ta'amilosaga o le Australian Super W Clubs i se taimi o lenei tausaga 2023.
I le fa'apa'aga a le Lakapi a le Lalolagi ma le Oceania Rugby, ua fa'ailoa ai nei e le Pacific Aus Sports le maua ai o se avanoa mo le tamaita'i ta'alo o le au lakapi fa'avaomalo mo Tamaitai a Samoa, le Manu Sina e mafai ai ona ta'alo mo le Western Force.
O Saelua e ta'alo i le Manu Sina, ma o se tamaitai talavou e mata'ina lana ta'alo i le 'au lakapi nei a Samoa i le vaega o Tamaitai.
"Fa'afetai mo le avanoa, matua lagona lava lo'u fiafia."o se tala fiafia lea a le tama'ita'i o Saelua.
Na fa'ailoa fo'i e le tamaitai talavou, e tele a ni vaega e tapena iai ma e iai lona fa'amoemoe o lea taumafai e toe aumai ni tomai ma meatotia o le a mafai ona maua mai i le au lenei o le ta'alo ai, le Western Force.
E le gata o le avanoa mo le tamaitai o Saelua, ae ua iai foi se avanoa sikolasipi ua maua e se tasi o tama'itai sa ta'alo foi i le Manusina ia Filoi Eneliko.
O Filoi o lo'o fa'auluulu iai le vaega o a'oa'oga mo le Lakapi a Samoa ma o lea ua maua lana avanoa fa'asikolasipi e toe a'oa'oina ai i tomai fa'afaiaoga i Ausetalia.
O nei avanoa mo tama'itai i ta'aloga lakapi o lo'o lagolagoina malosi e le Ofisa o le Komesina Maualuga a Ausetalia i Samoa, i lona fa'amoemoe maualuga ina maua avanoa tutusa mo tama'itai ma ali'i i tulaga o ta'aloga.
Comments