Suaina le ele'ele mo le fale fou aua le auaunaga o gasegase i le mafaufau.

Ua taunuu le miti a le fa'alapotopotoga o le Goshen Trust, o se fa'alapotopotoga tuma'oti mo i latou e iai a'afia o le mafaufau i Moamoa.

O le miti a le fa'alapotopotoga i tausaga ua tuana'i ina iai se latou fale mautu lelei aua le fa'atinoina o le latou galuega fesoasoani mo tagata o le atunu'u o loo feagai ma nei aafiaga.

O le afioga i le alii Minisita o le Matagaluega o le Soifua Maloloina ia Valasi Luapitofanua Toogamana Selesele sa saunoa i le lauga autu i le suaina o le eleele aua le fausiaina ai se fale mautu mo le auaunaga o le Gasegase o le Mafaufau.

I le saaunoaga a le Minisita o le Matagaluega o le Soifua Maloloina, na ia fa'ailo ai le agaga fa'agaeetia o le malo ona ua amata ona tino mai nei taumafaiga uma, aemaise o le itu taua lava lenei o le mautinoa o loo soifua maloloina le mafaufau.

O le fale lenei o le 'a fausia i se fanua a le malo, o le 'a fa'alelei atili ai lenei auaunaga tau i le mafaufau mo le atunuu lautele aemaise o le fa'amautu o fa'alauiloa mo lea gasegase.

O le malo o Iapani o loo latou fa'atupeina lenei poloketi aemaise o ni isi o paaga pisinisi a Samoa.

Na fa'afetai e le Minisita le sao tele a le malo e tauala atu i le Matagaluega o Puna'oa Fa'alenatura ma le Siosiomaga.