top of page

Sui fa’ai’u o ta’amu Toga ma ta’amū Niukini.

28 Oketopa 2022

I le fa'amanatuina ai o le aso fa'avāomālō mo mea'ai (World Food Day) i Sāmoa i le Aso Lua 25 Oketopa 2022 e pei ona faia ai i Savai'i i Salelolōga le sauniga fa'alemālō e fa'amanatu ai.


Na saunoa ai le afioga i le Minisitā o Fa'ato'aga ma Faigafaiva Hon La'aulialemalietoa Polata'ivao Fosi Schmidt e fa'ailoa ni isi o fuafuaga alu mamao a le matāgaluega ma le mālō i tulaga tau i fefa'ataua'iga mo 'oa fa'alenātura po'o fua o fa'ato'aga a Sāmoa e 'auina atu i maketi i fafo.


O se tasi o ia vaega e aofia ai le va'ava'ai lea o le matāgaluega ina ia sui le igoa o le ta'amū, mai i igoa ua māsani ai Sāmoa o le Ta'amū Toga ma le ta'amū Niu Kini ae ia fa'apipi'i iai le igoa o Sāmoa.


O le talitonuga a le afioga i le ali'i Minisitā, o le tāua o lea suiga ina ia mafai lava ona auina atu le ‘oloa a Sāmoa o lo'o pipi'i ai lava i luga lona igoa.


O le ta'amū toga e lanu meamata lona fa 'ae o le ta'amū Niu Kini e lanu violē lona fa.


O igoa lea ua fa’aigoa ai nei ta’amu, o le ta’amu Niukini o le’a fa’aigoa i le Ta’amu Salafai ‘ae o le ta’amu Toga o le’a sui lona fa’ai’u i le Ta’amu Samoa.


Na fa'afetaia e le Minisitā le galulue punoua'i o le 'aufaifa'ato'aga a Sāmoa e tusa ai o le atina'eina o so'o se fa'ato'aga.


O le malaga a le Minisitā o Fa'ato'aga na malaga atu ai i Ausetalia ma Niusila i nai masina ua tuana'i na ta'ua ai le mātalatala mai ai o ni isi o Maketi i ia atunu'u mo fua o fa'ato'aga a Sāmoa e 'auina atu ma fa'atau ai i fafo.


O se fiafiaga tele lea ua maua e Sāmoa ‘aemaise ai lava o le 'au faifa'ato'aga mea totō ma le au fai lafu manu.





181 views

Comentários


bottom of page