top of page

Tōfatu i le tama'itai o Moeloto lana aganu'u ma le fa'aaloalo.

"..o le toe 'amata mai a i le 'amataga...amata i upu fa'aaloalo, ia iloa upu e te talanoa ai i tagata..ia iloa ona e talanoa i matai, faife'au....e iai fo'i le talanoa e te talanoa ai i ou matua uso ma tuagane".



Miss Samoa contestant during an interview with Blutv Samoa.
Miss Lototau Agency- Moeloto Vitolia Willimina Tuila'epa Tiatia.

E ono faigata le fa'amasinoga a Fa'amasino i le Tauvaga mo le sa'ilia o se lalelei o Samoa i le Miss Samoa Pageant i le masina o Setema 2023, lea e taualuga ai fa'afiafiaga o le Teuila.


Ina ua maua le avanoa e talanoa ai ma fa'asoa ma se tasi o sui tauva o lea tauvaga tele , le tama'ita'i 22 tausaga le matua o Moeloto Vitolia Willimina Tuila'epa Tiatia, sa fa'asoa ai i lona silafia i le aganu'u ma le gagana Samoa.


O Moeoloto o se tama'ita'i Samoa na ola ma soifua ane i Niu Sila, ma o le 2 ai o ona tausaga na malaga mai ai loa i Samoa ma 'amata ai ona a'oa'o i le gagana, i a'oga Samoa e pei ona amata mai ai lona ola a'oa'oina i le A'oga o le Amosa o Savavau, lea na fa'avaeina e se tasi o polofesa o le Gagana Samoa ia 'Ai'ono Dr Fanaafi Le Tagaloa.


O le 4 o tausaga sa amata ai i le vasega 1 i le Amosa o Savavau, se'i o'o lava ina fa'au'u i le vasega valu(8) ma se'e atu ai i le A'oga Tusiata i Malua se'i o'o mai lava i le taimi lenei.


O se tama'ita'i e pele ia te ia lana gagana ma le aganu'u, e pei ona ia fa'ailoa le sao tele a ona matua ma matua o ona tua'a, o le tasi o a'oa'oga pito sili ona taua sa fesoasoani ai lona 'aiga i le tapu'eina o lona soifua o le ola lea i se olaga 'TUTO'ATASI'.


I se tama'ita'i e pei o Moeloto na ola ma soifua i atunu'u e malosi ai le fa'apalagi, sa ia fa'asoa i le taua o le a'oa'o i le gagana, ina ia iloa ai le va ma tagata, iloa le tu, savali ma le tautala.



O Moeloto i se isi itu o se tama'ita'i faipisinisi talavou, ina ua faasoa mai i le taua o le galue a'o talavou; e toe manatua ai lava le 'upu a ona matua ia iloa ona ola tuto'atasi. I lona talavou ma lona maua o se tupe mai i lana taleni tusiata, ua a'oa'oina ai o ia i le ola fa'asoasoa, ola tautua i fa'alavelave a le 'aiga a'o meafai a Ekalesia.


"E taua ia te a'u le vave ona amata le su'eina o le seleni, ona o totonu o Samoa e le faigofie le su'ega o le seleni e tausi ai le 'aiga, so for me my upbringing e tulei a a'u e o'u matua ina ia mafai ona ou independent, nofo sa'oloto i totonu o Samoa; ....".


"E taua fo'i ai te a'u ina ia ou iloa ai le fa'asoaga o seleni i totonu o le 'aiga".


Na maligi loimata o le sui tauva ina ua ia manatua le galuega ma sao a ona matua e ala i le tapu'eina o lona soifua o se tama'ita'i Samoa.


"E to'atele lava tagata matutua sa fesoasoani mai i lo'u olaga tuputpu a'e ua fai i lagi le folauga....., o le mafuaaga fo'i lena sa ou fia tauva ai, ina ia fa'alauiloa mea sa a'oa'oina ai a'u e matua o lo'u tina , ae le gata i lea o le toe fafagu mai o mea sa a'oa'oina ai a'u i aso la".


O le tele o le sao o matua i lona olaga, ua maua'a ai lava lona taofi i le toe fo'i lava i le amataga i tu ma aga sa 'amata mai ai e pei ona ia fa'asoa ai le nofo i lalo o le fala, ma fa'asoa ai i itu'aiga o gagana e talanoa ai i tagata.


"..o le toe 'amata mai a i le 'amataga...amata i upu fa'aaloalo, ia iloa upu e te talanoa ai i tagata..ia iloa ona e talanoa i matai, faife'au....e iai fo'i le talanoa e te talanoa ai i ou matua uso ma tuagane".



O Moeloto o se alo e fa'asino i Afio'aga o Avao, Fagamalo, Salimu-Fagaloa, Falelatai, Falevao, Fale'ula, Malifa ma Alamagoto.


O Moeloto o lo'o fai ma sui o le LOTOTAU Agency lea o lo'o tauva ai i le Tauvaga i le masina o Setema o ia o le Miss Lototau Agency.




470 views

Comments


bottom of page