top of page

Tōfia Tūmanuvao ma Ofisa Sili o Malaeva'alele.

Ua faamaonia nei le tōfia ma le filifilia ai o Tūmanuvao ma Faatonu Sili o le Pulega o Malaeva'alele a Samoa.


I le fonotaga a le Kapeneta i lenei vaiaso, Aso Lulu 13 Tesema 2023 na faamaonia ai lea tofiga i luga o fautuaga a le Komiti fa'afoe. O le tofiga a le susuga ia Tūmanuvao Evile Falefatu e tolu tausaga mo le Pulega o Vaalele a Samoa.



"O lea tofiga sa tau’ave e le afioga iā Silimana’i Ueta Solomona, peita’i ua fa’amavae ona o nisi o ona tofiga fou".


"O Tumanuvao sa a’oa’oina mai le Ā’oga Tulagalua a Ga’utavai, Savai’i, ona soso’o ai lea ma le Kolisi o Samoa se’ia o’o atu i le tausaga e 1998.


Na ulufale o ia i le Tausaga Fa’avae i le Iunivesite Aoao o Samoa (N.U.S. Foundation), i le mae’a o ana a’oa’oga ma auauna ai i le galuega fa’amisionare / tala’i mo lana Ekalesia a Iesu Keriso o le Au Pa’ia o Aso o Gata Ai mo le 2 tausaga.


Na fa’aauau lona soifua a’oa’oina i le Ā’oga Fa’afoma’i i Fiti mo le 4 tausaga se’ia fa’au’uina mai le tausaga e 2009 i lona Fa’ailoga Tauāloa o le Tikerī Fa'atalavai (Bachelor of Pharmacy).


Na tautua ai mo le Matāgaluega o le Soifua Mālōlōina, mulimuli ane galue ai mo le Pulega o Va’alele a Samoa (S.A.A.) mai le 2013 se’ia o’o mai le taimi nei i lona tofiga o le Ta’ita’i i le Auaunaga Tau i le Puipuiga (Manager for Security Services)".


O le tōfiga lenei o se tasi o tulaga tāua ao tapena ai Samoa mo le taligāmālō o le fonotaga a mālō o taupulega i le tausaga fou.

885 views
bottom of page