top of page

Ta'utino le faipule o Salega 1 ua mae'a ona aumai le fa'atagana a le Fa'amasinoga e malaga ai.


Ua tali le afioga i le ali'i faipule o le itumalo palota o Salega 1 ia Fepulea'i Faimata Su'a, e tusa o fa'amatalaga na agiga i fa'asalalauga i lona malaga i se malaga fa'alemalo ae o lo'o iai ni mata'upu o lo'o a'afia ai.


Na fa'asalalauina i ni isi o fa'asalalauga, ua malaga le ali'i faipule i Niu Sila ae o lea na taofia ona pepa malaga ma o lo'o saini fo'i i le Ofisa o leoleo ona o se mata'upu o lo'o molia ai e feso'ota'i atu lea i le maliu o le taule'ale'a o Tu'uau Fa'asavalu.

O le afiafi o le Aso Gafua na fofogaina ai le saunoaga aloa'ia a le alii faipule e tali ai i nei fa'asalalauga.


Saunoa le alii faipule e tusa o fa'asalalauga ua agiga, o ia na tofia aloa'ia e le fofoga Fetalai e 'auai faatasi ma ni isi o sui usufono o le palemene i lana usugafono i Niu Sila.

Ua mae'a ona fa'atino ma uia ala o mea, e ala lea i le talosaga sa tu'uina atu lea i le Fa'amasinoga mo se fa'atagana e malaga ai.


Ua fa'amanino ai nei e Fepulea'i, ua mae'a ona tu'uina mai le fa'atagana a le Fa'amasinoga e malaga atu ai i fonotaga fa'apalemene i Niu Sila.


O le afioga ia Fepulea'i sa taofia ona pepa malaga ina molia e leoleo i moliaga o lona taumafai e fafau molimau i le mata'upu o le maliu a le susuga ia Tu'uau Fa'asavalu.


1,678 views

Comments


bottom of page