Tali e Lalomauga le sulu a le To'omaga mo e Puapuagatia.

Ata Pueina: SVSG

Tusia: Demetrius Ah Mau.

O le asō na tatala aloa'ia ai le fa'amoemoe a le Faalapotopotoga o le To'omaga mo ē puapuagatia, o le sulu ua ta'ua o le 'Sulu o le Filemu '(Torch of Peace).

Na amata fa'asavali atu le sulu i le taulaga o Apia i le taeao nei ma aga’i atu ai i le Itumalo o Anoama’a.

Sa ūia atu afioaga uma o le itumalo Anoama’a, seia taunu'u atu i le afioaga o Lalomauga, ma ua iai le faamoemoe e mapu ma mālōlō ai se'ia aulia le aso fou ona fa'aauau lea.

O le faletele(hall) ale EFKS Lalomauga o lo’o tali ai e le afioaga le sulu o le Filemu.

O le susuga le faafeagaiga ia Sakaio Maiava o lo’o ta’ita’ia le sauniga e amatalia ai fa’afiafiaga ma polokalame ua tapena e le komiti a tinā Lalomauga faapea le Autalavou.

O taula’i uma o nei faafiafiaga e patino tonu i le taofi o sauaga.

O le faamoemoe a le toomaga ina ia soo le motu o Upolu i lea sulu, i le naunautaiga ina ia faasusulu atu le sulu i tagata uma o loo latou faatinoina pea sauaga ma lē maua ai se filemū o isi.