top of page

Tali le faipule o Faasaleleaga 2 i tu'ua'iga fa'asaga ia te ia.


Ua tali aloaia le faipule o le Itūmālō Palota o Faasaleleaga 2 i tuuaiga na tuuaia ai o ia, e faapea ua ia faaaogaina se seleni o poloketi a lona Itūmalo.


O le aoauli nei, na tuuina mai ai se pepa o Faamatalaga a le Faipule e faamanino ma tali mai i nei tuuaiga.


E tusa ma le $150,000 na tuuai ai lana afioga i le alii faipule, e faapea ua ia faaaogaina mai i tupe a le itūmālō.


Ae peitai, ua tali le faipule ia Magele Sekati Fiaui o nei tupe e tuua'i ia, e leai lava se tupe sa ia fa'aaogaina.


Ua ia faailoa foi, o le tusi tupe a lona itūmālō ma tala o tupe o galuega faatino o loo iai lava lea i le failautusi a le Fono Faavae, ua ia faailoa foi ua māe'a ona tuu atu lipoti a le Itumālō i Komiti Galue a le Matagaluega o Tinā ma Tamaitai, Atinae o Nuu ma Agafesootai auā a latou iloiloga masani.


Ua faaalia ai fo'i le faamaualaloga a le Faipule i lona itūmālō ona o le agiga o lona igoa i nei tuuaiga, ma ua ia tautino e leai lava se tulaga faapenei e mafai ona ia faatinoina ona o lona lagona o le 'ā avea ma ala e māmāsagia ai le tofi a lona itūmālō.


O le afioga ia Magele Sekati Fiaui, sa filifilia e lona itūmālō i le tofi i le Palota o le tausaga 2021 ma o loo avea nei ma Minisitā Lagolago o le Matāgaluega o Tupe.

5,053 views

Commentaires


bottom of page