top of page

Tali mai Fiti mo foma’i fa’apitoa e sa’ilia maliu lilo i Samoa.

13 Setema 2022

O se tasi o itu faigata i le tele o mata’upu i fa’amasinoga o maliu lilo, o le leai lea o se foma’i fa’apitoa e sa’ilia ma fai ni ta’otoga fa’apitoa e sa’ilia ai ni mafuaaga o le maliu o se tagata e le’i silafia ma iloa lona mafua’aga tonu aemaise lava oni mata’upu i fa’ao’oga lima e leai ni mau e faamaonia ma fa’amautu ai ni fa’amaumauga ‘a le matagaluega o leoleo e ono mafai ai ona tu’uina atu i le fa’amasinoga pe’a mana’omia.


Ua fa’ailoa nei e le afioga i le Komesina o Leoleo le tofa ia ‘Auapa’au Logo’itino Filipo i le lomiga a le Savali, o lea ua mae’a ona fa’ata’oto le fuafuaga ina ua ma’ea faia se sainiga lima o se maliliega i le va ole Matagaluega o Leoleo a Samoa ma le ofisa o leoleo i Fiti, e mafai ai ona malaga mai se foma’i fa’apitoa mai Fiti e fa’atautaia ta’otoga fa’apitoa pe’a manaomia.

Na ta’ua e le ali’i Komesina o leoleo, Ola toefuata’iga ma Falepuipui, o se tasi lenei o fa’afitauli ma lu’itau tele o lo’o feagai pea ma le matagaluega o Leoleo i Samoa ona o le leai lea o se foma’i fa’apitoa a Samoa lava ia.


O le tasi fo’i lea o itu e umi ai ona maua ni i’uga o ni mataupu tau solitulafono e mafua ai se maliu ma o’o ai i le fa’amasinoga, ae e le gata i lea o le ‘umi ai fo’i ona ta’atia o se tino maliu i le falemaliu ona e tatau ona fa’atino ni ta’otoga fa’apitoa mo fa’amaumauga ma su’esu’ega a leoleo.


Ua fa’amautinoa mai e le Komesina o leoleo ia ‘Auapa’au Logoitino Filipo, e to’aono ni foma’i fa’apitoa mai Fiti ua fa’amoemoe o le’a fesoasoani mai ia Samoa mo ni ta’otoga fa’apitoa oe ua maliliu pe’afai e mana’omia.


107 views

Comments


bottom of page