top of page

Talosaga Afega i le fa'amasinoga e ave'esea tagata o lo'o nonofo i fanua o le nu'u.



Ina ua manumalo le nu'u o Afega i le faaiuga a le faamasinoga i le vaiaso na te'a nei faasaga i le talosaga e taofia ai atinae o lo'o fa'atinoina i luga o fanua i Levi ma Alamutu, o lea ua talosagaina ai e sui o Afega se poloaiga mai le Faamasinoga e ave'ese ai tagata ua latou talitonu o loo nonofo faasolitulafono i fanua nei.


I lipoti a le Talamua Media o lo'o ta'ua ai, o i latou nei e aofia ai se tasi o 'aiga mai Leauva’a, lua aiga mai Levi ma le nuu tuaoi o Lotoso’a.


O le vaiaso nei na amata ai le fofogaina o se poloaiga a le Fa'amasinoga o Fanua ma Suafa ma sa fa'aulu ai ni itu a isi o 'aiga o afio'aga o Lotoso'a Sale'imoa e fia avea ma isi itu auai o lea fa'amasinoga.


O ni isi o 'aiga nei o lo'o fausiaina o latou fale i luga o fanua nei, ma latou te le'i silafia ua iai se talosaga a Afega mo le fa'amasinoga ina ia ave'esea ai i latou mai i fanua.


O le vaiaso na te’a nei na tuuina atu ai e le Faamasinoga o Fanua ma Suafa se faaiuga e faasaga i le taofia o le talosaga a Alii ma Faipule o Levi & Alamutu Saleimoa mo Afega ina ia taofia le galuega o lo'o fai i luga o ia fanua.


O le taimi nei, na talosagaina ai e Afega se poloaiga e faatulai ese ai i latou mai le eleele ina ia mafai ai ona faaauau a latou galuega.


Na saunoa le afioga ia Maulolo Tavita Amosa o le sui o le afioaga o Afega, e iai fanua na tuuina atu ia Le'ava'a e galulue ma nonof ai ae ia i lalo lava o le fa'amalumaluga a Afega e pei fo'i ona iai fanua sa tu'uina atu ia Levi ma Alamutu.


O le fa'aiu a le fa'amasinoga i le tausaga 1963 na manumalo ai Afega ia Tuana'i ma o lena fa'ai'uga lea o lo'o fa'amamaluina lava i lenei taimi lea iai le finauga ua finau mai ai Levi ma Alamutu.


I le fofogaina o lenei aso, sa i ai tagata mai Tufulele ma isi afioaga i le itu i sisifo o Afega sa naunau i le taunuuga o le iloiloga.


O lo o faaauau pea le mataupu i le Faamasinoga o Fanua ma Suafa.

135 views

Comments


bottom of page