8 Novema 2022
PC: Twitter.
Ua momoli mai se tu'ualalo a le afioga i le tama'ita'i pule ia Malaea Lauano ma le pūlega o le Kolisi Maualuga a Leifiifi i le mamalu o mātua ina ia fesoasoani i le puipuiga o le saogalemu o le fanau ma i le a'afia ai i vevesi e pei ona sa molimauina i le vaiaso ua te'a i le taulaga.
O le Aso Faraile 4 Novema 2022, na tula'i mai ai ni vevesi i le va o a'oga i le taulaga ma o lo'o fa'agasolo ai sa'iliga a leoleo i ni isi o latou o lo'o masalomia sa fa'atupuina nei vevesi.
O le fa'amanatu a le Kolisi o Leifiifi i mātua, ina ia piki ina fanau a'oga ma momoli atu i le falea'oga ina ia mautinoa ai le saogalemu mai i ni vevesi e ono toe tula'i mai.
I se pepa o fa'asalalauga fa'alaua'itele a le Kolisi i lana itulau o le facebook o lo'o fa'amamafa mai ai e le Pulega o lenei Kolisi le galulue fa'atasi o matua ma faia'oga ma so'o se isi i le mata'ituina o nei tulaga.
"E faamanatu atu i matua lou tiute o le puipuiga o le saogalemu o le fanau pe a tatou vaavaai atu i amioga ma faafitauli e pei ona sa maitauina i lena vaiaso ua tuanai i le taulaga e faamamafa atu ai lava i matua ina ia momoli sao mai fanau i le faleaoga mo le latou saogalemu ao faatino suega ma e faapena foi i le tuua o le aoga. Afai foi e leai se taavale e momoli mai ai e tatau lava ona i ai se tagata matua e susu faatasi mai ma lou alo aua lava lona saogalemu. O loo galulue lava alii ma tamaitai leoleo mo le saogalemu aemaise le tau sailiina o le mafuaaga o nei faafitauli ua tutupu mai ma aafia ai fanau. O le tatou galuega fai faatasi o le tausiga o le saogalemu o fanau. Saunoa ane i fanau e aua le alu fua i le taulaga e aunoa ma se mafuaaga tatau. A leai se vasega nonofo lelei i le fale ma fai meaaoga.Ua manino ma ua maea faataatitia aulape o nei ituaiga amioga pe a faamaonia ma mautinoa o lou alo o loo aafia i nei amioga le taupulea. Tatou galulue faatasi mo le saogalemu o fanau."
Ua momoli mai fo'i se fa'amaualaloga a le Kolisi i le atunu'u lautele ua a'afia ni lagona 'ona o amioga a le fanau.
"E faamalulu atu foi ona o le aafia o lagona ma mafaufau o le mamalu o matua, uo ma paaga a lenei Kolisi ona o amioga ma faatinoga a nisi o fanau ua le taupulea ma le alolofa i matua."
Ae e maualuga fo'i le fa'afetai a le Kolisi, le afioga i le Tama'ita'i Pule ma le Komiti i le fesoasoani ma le lagolago a ni isi o fa'alāpotopotoga e ala i fautuaga ma fa'asoa ua so'oso'o tau'ai ai ma le ofisa i le tau tineia o amioga o le sauaina e ni isi o fanau e ni isi fo'i o tamaiti a'oga.
"E momoli foi le faafetai i nisi o tamalii ma taitai o faalapotopotoga e ala i fautuaga ma faasoa ua soosoo tauau mai ai aua lava le tineia o nei amioga o le sauaina o nai fanau e nisi o tamaiti mitavale ma le vaivai o le ola faaleagaga. E matua le taliaina lava nei amioga i totonu o le aoga ma o loo galulue malosi foi le pulega ina ia taofia ma tineia nei amioga mataga ma le taupulea. Ia fesoasoani mai le agaga o le Atua e mafai ai ona faia faaiuga uma e tatau ma tonu aua le saogalemu o fanau. "
Comments