Tapena le Manu Samoa ta'ito'afitu i le vae muamua o le 2024 i Ausetalia.

By Lauano Demetrius Ah Mau.

Ole aai o Perth I Ausetalia o le a tatala ai taamilosaga taito'a fitu o lenei tausaga.

O Ausetalia lea o le 'ā talimalo I le faaiuga o le masina lenei le aso 26 aga’i atu ile aso 28 o le a faia ai le ta’amilosaga taito'a fitu i Perth.

O le toe faaauauina o le taamilosaga taitoa fitu o le lalolagi mai le tausaga ua te’a, ae o le ulua’i taamilosaga lea mo lenei tausaga.

E tolu pulu ua vaevaeina ai au e 12 o le a tausino i lea taamilosaga. O Samoa lea ua fatulaga mai ile pulu C faatasi ai ma Fiti, Farani ma Niu Sila.

O le taimi nei e le’i tolaulauina le lisi o e ua filifilia i le au taitoa fitu o le Manu Samoa.

E le'o mautinoa foi pe o le a toe filifilia le susuga ia Vaafauese Apelu Maliko ona o Lo’o feagai ma manuaga mai taaloga ao taalo i i lana kalapu i Peretania.