O le Aso To’ona’i o le vaiaso na mavae nei na auai atu ai nisi o sui o le malo ma minisita i le afioaga o Patamea i le motu tele i Sava’i, aua le tatala aloaia o le vai tumaoti o Patamea.
Ua silia ma le 40 tausaga o feagai pea le afioaga o Patamea ma le faaletonu o le suavai taumafa, ma o lea ua tino ma taunu’u e ala mai i le Poloketi o le Itumalo 1 miliona.
O lenei poloketi ua mafai ona maea ma fa’ataunu’uina e ala i tupe e tauala mai i le poloketi a le malo o le 1 miliona sa faatupeina ai lenei galuega tele.
O le afioga i le sui palemia o le faipule foi o le itumalo faapalota o Gagaemauga 1 na fai ma sui o le afioaga e talia ma le agaga faafetai i le afioga i le tama’ita’i palemia ma le kapeneta e ala i nei fa’amaite ma fuafuaga lelei aua le
atina’eina o afioaga ma aiga o le itumalo.
Na faafetaia fo’i e le afioga i le faipule le tama’ita’i
minisita o Tina ma Tamaitai Nuu ma Afioaga Atinae ma Agafesootai Mulipola Anarosa Molioo i le lagolagosua ma le amanaia o le talosaga o le itumalo i le tele o taimi e faatagisia ai se finagalo lea ua faataunuuina ai aua o ia tonu lea e taitaifono i le poloketi o le 1 miliona a le malo.
I se vaega o le saunoaga a le afioga i le sui palemia na taua ai, pau lava lea o le poloketi na mo’omo’o ma nanau iai le nuu o Patamea aua ua autausaga o feinu mai i le vaitafe e leai se faatanoa, leai se faamama leai se tane vai e taofia ma teu ai se suavai faaleoleo.
A o’o ina aati ma sua tutu’i mai le vai o Mali’oli’o e satia ma tafefea uma ofe paipa agai atu i le sami ma o le galuega tele a le nu’u o le toe tau aoao mai ma fa’apipi’i o nisi paipa e leiloloa atu ai lava.
Na faapito augafa le faafetai i inisinia le susuga ia Leaula Petaia Mafulele ma le afioga ia Seugamalii Jamie Saena ma le aufaigaluega atoa ale Vision Engineering Limit i le tomai sa faatinoina ai le galuega faigata lea ua maea ma lelei.
O le susuga i le faafeagaiga ia Rev. Tanielu Tupuse na taitaia le faamoemoe e ala i se upu faaleaagaga ma o ia fo’i sa ootina le lipine e tatala aloaia ai le vai tumaoti o Patamea.
O le afioga le faipule ia Tuala Tevaga Iosefo Ponifasio ma le afioga ia Lauano Fili faapea le Minisita o soifua maloloina le afioga ia Valasi Tafito Selesele na muai tofoina ma faamaonia ai le mama ma lelei o lenei vai tumaoti a le afioaga o Patamea.
Comentarios