top of page

Tautau meafaipelē a Mark Hunt i le mae'a ai o le fusu'aga ma Sony Bill Williams.

7 Oketopa 2022


Ua tautau mea fai pelē a se tasi o alo o Sāmoa le susuga ia Mark Hunt i le mae'a ai lea o le la fusu'aga ma se tasi fo'i o alo o Sāmoa le susuga ia Sonny Bill Williams i le fa'ai'uga o le vaiaso.


O Mark Hunt o se ali'i fusu i le itu'aiga o fusu'aga e fa'aaoga ai ma vae(Kick boxing) ae o le ali’i o Sonny Bill Williams o se ali'i fusu toe ta'alo lakapī.


O le taimi muamua lenei ua faia'ina ai Sonny Bill i sana fusu'aga, lea o lo'o fa'amauina ai e 9 ana manumalo mai i ana fusu'aga e 9, o lana fusu’aga mulimuli na ia fa'ato'ilalo ai Barry Hall i le māsina o Mati.


I le ‘amataga o le fusu'aga na lelei lava , ae ina ua ‘āmata na vevela le fusu'aga ,na amata ai loa ona tatala tau'au o ali'i fusu se'i o'o i le ta'amilosaga lona 3.


I le ta'amilosaga lona 4, na maitauina le malosi o le osofa'i a Mark Hunt, o le taumatau kolosi a Hunt na taunu'u lelei i le 'auvae o Sonny ma mamulu mai ai i fafo le tali 'oloa(mouthguard), na toe tuliloa atu isi apakaki(uppercut) malolosi ma tautevateva solo ai Williams na i'u ai i le to'otuli i le tulimanu o le maea.


Na toe tula'i mai Sonny e fa'aauau le fusu'aga peita'i, e le'i 'umi se taimi 'ae toe taunu'u atu ai i lona 'auvae se tu'i malosi ma fa'aauau ai pea ona samala lelei e Hunt se'i o'o 'ina pa'ū ane ma sa le'i toe iai se fa'ai'uga a le laufalī e faitau 'upu ae ua taofi loa le fusu'aga.


O le mae'a o lenei fusu'aga ua aloa'ia ai nei ma le litaea mālōlō ai o Mark Hunt mai i le ta'aloga o fusu'aga i le mavae ai o tausaga e 30.


O Mark Hunt ua 48 tausaga lona matua, e 11 tausaga e matua ai ia Sonny Bill Williams. Na soifua ane Mark i Niu Sila i ni matua Samoa, ma na malaga atu i Ausetalia ma fa'amautu ai ma lona 'aiga e o'o mai ai i le taimi nei.


246 views

Comments


bottom of page