top of page

Tetele le palolo i Falelima, Savai’i.

17 Oketopa 2022

O le taeao nei na maua ai se tala mai Falelima i Savaii i le tāina lea o le i'a o le Palolo.


Na fa'ailoa mai e sē tasi o pa'aga ‘a le Bluwave i Falelima le molimauina ai lea ‘o le tetele o le i'a lenei o le palolo i lenei tausaga i le afio'aga.



O le to'atele na usu i le taeao ‘ae le'i tā ina le itula e 5 e fa'atalitali le taunu'u atu 'o le i'a lenei i gataifale o le nu'u.


I le tausaga ua mavae na molimauina ai fo'i le tulaga o le tetele ai o le i'a o le palolo i Salafai.


Ina ua mae'a mai tā gā palolo ‘a le afioaga sa maitauina fo'i le to'atele o tagata fai pisinisi, e pei o fale'aiga, faletalimālō ma isi tagata aga'i atu e fa'atau lenei i'a.


O se i'a sa fa’aaogā ‘e le to’atele i tausaga ua tuana'i e feasia'i ai i 'aiga peita'i i lenei taimi, ua fa'aaogā e tagata ina ‘ia maua ai se isi ala gā seleni.


I le tau lava o le 'ofu palolo e tusa ma le $25, $30 po'o le $50 e fua lava i le lapo'a ole 'ofu palolo.


I tausaga ua mavae na maua ai le palolo e fa'atauina atu i container i le tau $150 e o'o atu lava i paelo masi i lona tau $1,000.


O isi nu’u i Savai’i sa tetele ai le palolo, o Neiafu, Asau ma Auala i le iutmalo o Vaisigano.


E talitonu ‘o le tulaga lava lea o lo'o iai nisi o nu'u ma afio'aga i Savai'i i le māsina lenei o ‘Oketopa.


Na āsia 'e le Bluwave le Maketi o i'a i le taeao nei i Savalalo, peita'i e leai nisi o fa'atauina ni palolo. Na talanoa atu i le 'au fai faiva ma na latou fa'ailoa e le'i iloga na malosi le palolo i Upolu nei.


O le masina lava o ‘Oketopa i tausaga ta'itasi, e māsani ai lava ‘ona tetele le i'a lenei i Savai'i ae feoloolo lava le motu i ‘Upolu, o Nōvema le māsina mulimuli e tā ina ai le palolo.









1,415 views

Comentarios


bottom of page