top of page

To’alua sui fou i le lisi ole Manu Samoa mo le vae i Toulouse.

Ua mae’a ona fa’alauiloa ma fili le ‘au ale Manu Samoa ta’ito’afitu e le susuga i le faiaoga Muliagatele Brian Lima mo le vae o le ta’ito’afitu i Toulouse i le aso 20,21 ma le aso 22 o Me aemaise ole vae i Lonetona.


I le lisi a le susuga ile alii faiaoga ua filifilia ai ma nisi o sui fou na Malaga sa’o atu i Samoa e sui tulaga I nisi o sui ole ‘au na manunua.


O le alii o Neueli Molesi Leitufia o se tasi o ali’i taalo malosi i le kalapu lakapi a Lauli’I Lions e pei ona iloga ai foi i le Taamilosaga a le Vailima Malisi i le tausaga ua tuana’I, ae o le alii o Ati Junior Ati ose sui foi mai i le kalapu ale Laulii Lions o i laua uma nei lea na Malaga atu mai Samoa e faatasi atu i le tolauapiga a le ‘au a Samoa i Dubai.



E 13 I latou ua mafai ona fili ai le ‘au mo nisi o vae ole’a sosoo nei:

1.Melani Matavao

2.Vaafauese Apelu Maliko

3. Vaovasa Afa Sua

4. Ati Junior Ati(sui fou)

5. Faafoi Falaniko

6.Iafeta Purcell

7. Neueli Molesi Leitufia(sui fou)

8. Miracle Faiilagi

9. Motu Opetai

10. Owen Niue

11. Paul Scanlan

12. Steve Onosa’i

13. Uaina Sione.


Fa’ailoa e le alii faiaoga Muliagatele Brian Lima, ua sauni ma tapena le ‘au ina fa’aleleia tele o isi vaega e manaomia ona fa’aleleia aua le alo atu ai mo isi vae o lo’o totoe aemaise ole taula’i ile vae ole’a sosoo I Toulouse ma Lonetona i le masina o Me ma Iuni.


E ono vae ole taamilosaga taitoafitu nei ale lalolagi ua mae’a e pei ona amatalia mai i le tausaga ua mavae i le masina o Novema, sa le’i mafai ona auai ai le Manu Samoa i nisi o vae o lenei ta’amilosaga ona o le tulaga sa a’afia ai ile siama ole Koviti 19.


Ua toe tolu ai nei vae ole taamilosaga olo’o totoe mo le tausaga nei 2022, ole vae lea ole’a sosoo ai I Toulouse ile aso 20-22 o Me, Lonetona ile aso 28-29 o Me male vae faaiu ole taamilosaga ile aso 27-28 o Aukuso 2022.


I vae e lua ua mae’a I Seville ma Singapore na molimauina ai le maualuga o taumafaiga ale Manu Samoa taitoafitu, lea e maea ane ua me’I mai le tulaga a Samoa ile tulaga 15 oloo iai ile taimi nei.




480 views

Comments


bottom of page