E talitonu 'āiga o aufaifaiva e to'atolu na tu'ua o latou 'āiga ma le nuu i le Aso Faraile mo fagotaga, o mana o tatalo ma anapogi na toe fa'asaoina ai i latou mai le sami.
O le aso Faraile na tu'ua ai e le tamā ia Talaoloa Crichton, Karene ma Leitaua le aiga i Fagasā, Sataua i Savaii ae agai atu mo fagotaga. E po ane le Aso Faraile e le'i toe fo'i ane ma sa le'i maua se fesootaiga ma 'āiga ae o le taimi foi ua leaga le tau i gataifale.
O lagona atuatuvale ma le popole na tupu ane i 'aiga ma fanau, uma lenā afiafi malama le Aso Toonai e lei toe fo'i ane ma agai ai loa vaa a le nuu ma leoleo e amaya sailiga.
O le aoauli o le Aso Toonai 2 o Tesema 2023 na toe taliu mai ai i uta nei va'a na agai mo sailiga ma le tala e le'i maua.
Sa faaauau pea ona nonofo o le tapuaiga a le nuu ma aiga i fale gatai i le Matāfaga, ae o lagi pese ma tatalo mo i latou nei.
E lata i le itulā e 6pm ae va'aia loa le vaa ua faaofiofi ane i le ava i gatai tonu o le nofoaga o le falema'i tuai i Sataua.
Sa lei faatali taulelea ma ni isi o aiga ma le nuu ae ua tamomoe agai i tai ma tauvalaau, ae o leo o faafetai i le Atua ona ua toe faafoi mai nei tamālii i le pa'umātū i le savali o le lua aso o iai i ogasami o le atunu'u.
Sa faafetaia e tamā ia Talaoloa le tapuaiga ona 'aiga ma le nuu aemaise o le vavega a le Atua ua mafai ona faasao mai lo latou soifua mai le sami.
Comments