10 Iuni 2022
Ua toe taofia e le matagaluega o leoleo se alii mai Lotopa ina ua toe maua i sailiga a leoleo le faatinoina pea e lenei alii o soligatulafono e ala ile faatauina ole fualaau faasaina ole 'aisa mole faamoemoe e maua ai le seleni.
E lima tausaga na nofo falepuipui ai lenei alii, ma e lei leva ona toe tatalaina i tua ae olea ua toe maua neu e le matagaluega o leoleo nisi foi o ana soligatulafono sa loka muamua ai foi.
E 5.114kalama ole 'aisa na mauaina e leoleo, o mariuana, ole meatotino e ula ai le 'aisa poo le paipa, o tinoitupe Samoa e $924.50 , $374 tupe Amerika, ole $90 tupe Ausetalia male $20 tupe Niu Sila.
Na aoina foi e le matagaluega o leoleo telefoni, komepiuta, tusifolau Niu Sila, Filifili ma tautaliga 'auro aemaise o se taavale o le tituaiga ole VOLVO e tusa lona tau aofa'i male $60 afe tala.
Taua e le sui komesina o leoleo ia Auapaau Logotino Filipo, o lo’o sailia pea e le matagaluega ni isi o i latou o lo’o iai se feso’otaiga ma le faia o lenei gaioiga faasolitulafono.
O le tatalo a le matagaluega o leoleo ina ia mafai ona galulue faatasi leoleo ma pulega alii ma faipuile aemaise o so’o se tasi lava e maua ni tala o soligatulafono ina ia agai atu e logoina le matagaluega.
O le aso 20 Iuni 2022 o lea tulai ai lenei alii e tali i ona moliaga i luma ole faamasinoga ma e iai foi le faamoemoe e ono iai ni faasalaga fa’aaopoopo i lenei alii ona olea sa loka muamua ae peitai e foliga mai e leai se salamo i nei faasalaga.
Comentários