top of page

Toe tolopō i le Aso Faraile le Matā'upu a Sam, Sivai,Lise, Lio ma Fepulea'i e tusa o talosaga a lōia.


O le taeao nei, Aso Gafua 20 Me 2024 na vala'auina ai le matāupu o lo'o mōlia ai Samuelu Su'a, Sivai Kepi, Fepuleai Faimata Su'a, Lio Fataumalama Auava ma le tamaitai o Lise Marie Schmidt i luma o lana afioga i le tamaitai Faamasino ia Talasa Sa'aga Atoa o le Faamasinoga Faaitūmālō.


O lea matā'upu e so'otaga i le maliu o le taule'ale'a talavou o Tu'u'au Fa'asavalu i le tausaga e 2021 i Vaitele.


O le taeao nei na tu'u e amata ai ona vala'auina mau o lea matā'upu, ae peita'i sa faailoa e le tama'ita'i ia Lise Marie Schmidt; o loo ua toe tolopō atu i le Aso Faraile 24 o Me le toe fofogaina o le latou matā'upu.


Ona o lea sa talosaga a latou lōia i le Fa'amasinoga, ia tolopō atu i se isi aso ona e iai isi vaega tāua o loo manaomia ona faatūlaga, e pei o le aumai lea o KCs mai fafo aemaise o latou taimi avanoa ma le faaliliuina lea o mau tusitusia a le itū a leoleo.


Sa umi foi se taimi na tau fetuunai ai taimi ma aso, ma o lea ua aumai le tala e tatau ona vala'auina ma iloilo lea matāupu i totonu o le va o le Aso 20 ma le Aso 31 o le masina nei o Me 2024.


I le talia ai o lea talosaga, sa tuuina mai ai e le faamasino le aso Faraile 24 o Me i le 10am i le taeao e toe fofogaina ai, ma o le 'a tuuina mai ai ma le aso poo le taimi o lenei tausaga e iloilo ma suesue ai mau o lea mataupu tāua.


Na faailoa e Lise, o loo iai le naunautaiga a le tamaitai Faamasino ia Talasa Sa'aga Atoa; e tatau ona vave tagofia le matāupu lenei i le tausaga lava lenei, ia aua nei aulia le tausaga fou ona o se matāupu tūga ma o loo iai le taula'iga tele a Samoa.


O loo faatumauina pea moliaga faasaga iai latou, e lei iai ni moliaga faaopoopo e pei ona faamanino e le tamaitai ia Lise.

Comments


bottom of page