Tu'ualalo leoleo i tagata lautele e lipoti atu ta'avale leotetele pu ma isi.

27 Ianuari 2023

Sui Komesina o Leoleo a Samoa le Afioga ia Papalii Monalisa Keti

Ua fautuaina nei e le Matāgaluega o leoleo le mamalu o le atunu'u ina ia lipotiina atu i le Matāgaluega ni ta'avale e maitauna le fai o mōlī fa'aaopoopo, o pu leotetele, musika ma sipika fa'aopoopo i luga o ta'avale.

O lenei tu'ulalo ua tu’uina mai mo le lautele ina ia galulue fa'atasi ai ma le Matagaluega, e afua mai i ni isi o fa'asā mai i nu'u ma afio'aga ona o le tūlaga faigata ona fa'atonutonuina.

Na saunoa le afioga ia Papalii Monalisa Keti o le sui Komesina o le Matāgaluega o leoleo; o lo'o iai le tulāfono fa'atonutonu mo ta'avale afi i Sāmoa.

Ae o le mea o lo'o tupu, o le to'atele o nei tagata fai ta'avale, e uma ona pasi le ta'avale ae toe o fo'i ua toe fa'apipi'i sipika ma mōlī fa'aopoopo e le’o fatagaina i le tulāfono ‘aemaise o pu 'ea leotetele.

E iai fa'asalaga fa'aletulafono pe afai ae maua so'o ia se tagata e na te lē usita'ia nei tulafono mo le saogalēmū o feoa'iga i le lauele'ele.