29 Novema 20222
O se tala fa'anoanoa na maua i le taeao o le Aso Lua 29 o Novema 2022, ina ua tu'umalo le afioga ia Tapunu'u Niko Lee Hang o le faipule mo le Itumalo fa'apalota o Vaimauga Numera 3.
Na fa'amanavaina e le Atua galuega a le afioga ia Tapunu'u i le maota gasegase o Tuiatua Tupua Tamasese Mea'ole i Moto'otua i le toe taliu mai ai o lana faigamalaga sa sa'ili fofo atu ai i Niu Sila i nai vaiaso talu ai.
O le afioga ia Tapunu'u na ulua'i tofia e avea ma faipule i le tausaga e 2001 ina ua mae'a se faiga palota laiti'iti mo sui taito'a tasi ma manumalo mai ai.
O se tamali'i ua loa fo'i le tautua i 'upu fai o malo, na amata mai lava i le tausaga e 2001 se'ia o'o mai lava i le taimi lenei ua fa'amalolo ai e Le Atua ana galuega.
O le tausaga e 2006 na ulua'i tofia ai i le tofiga Minisita o le Matagaluega o Tupe ma fa'aauau mai ai lava, 'ae i le tausaga e 2016 ina ua toe fa'amanuiaina i le faigapalota tele; na toe tofia ai ma avea ai ma Minisita o le Kapeneta i le Matagaluega o Galuega Tetele.
O Tapunu'u o se su'etusi fa'au'uina ma o lo'o ia umia ni fa'ailoga maualuluga mai i le Iunivesite o Otago i Niu Sila.
E maliu Tapunu'u ua 68 tausaga le matua o lona soifua.
E momoli atu ai fa’amaisega i le faletua, fanau aemaise o ‘aiga ona o le motusia ai o le mafutaga ma le afioga ia Tapunu’u talu le malaga a le maliu ma le oti.
Comments