top of page

Ua pasia e le Palemene NZ le tulafono taufa'aofi o sitiseni Samoa i le fesoasoani a le ACT ma le NZ First e ui ina tete'e le Palemia ma lana vaega fa'aupufai.


E ui ina tete'e le Palemia o Niu Sila ia Christopher Luxon ma le National Party i le toe fa'atu mai o le Tulafono Tau Fa'aofi e le Faipule o le Green Party ia Tuiono ina ia toe fa'afo'i ai sitiseni o tagata Samoa sa ave'esea i le Tulafono e ave'ese ai Sitiseni Niu Sila o tagata Samoa i le 1982, ae na matua lagolagoina e le vaega fa'aupufai o le ACT ma le New Zealand First lea pili i le Palemene i le po anapo i le lagolagoina o le tulafono taufaaofi e filifilia ai se komiti e silasila i lea mata'upu.


O le tulafono taufaaofi, o le taumafai ina ia toe Fa'afoi Sitiseni o Tagata Samoa sa ave'esea mai i le tausaga e 1982 ina ua pasia se tulafono i lena taimi.


E tusa ma le 5000 tagata na fananau i le tausaga e 1924 ma le 1949, o le 'a taumafai e fa'afo'i o latou Sitiseni Niu Sila lea na ave'esea mai i le tausaga 1982.


“O le amiotonu o le fatu lea o le tulafono taufaaofi,” o le saunoaga lea a Tuiono i le Palemene,o le faipule a le Green Party na ia laga'ia lea mata'upu ma fa'ata'atia lea pili po'o le tulafono tau fa'aofi i le Palemene.


Na patipati le itu agai ma le mamalu o le atunuu ina ua faapea mai le faipule o le ACT, Parmjeet Parmar, o le a lagolagoina e lana vaega le pili e filifili ai le komiti, ona faapea mai lea o Casey Costello o le a lagolagoina foi e le Vaega Fa'aupufai a le New Zealand First.


Na tumu le falefono a Niu Sila i le au lagolago e aofia ai ma ni isi o tamalii Samoa sa faipule muamua o Arthur Anae ma Aupito William Sio. Sa afea fo'i le Palemene a Niu Sila e le Fofoga Fetalai o le Palemene o Samoa ma nisi o faipule ma sa latou molimauina ma lagolago lea tulafono tau fa'aofi.


Na pasia le pili i lona faitauga muamua, e 74 palota i le 49, ae na'o le National na palota tetee i ai.


O le tulafono taufaaofi o loʻo faʻaalia ai le fa'anoanoa o tagata Samoa talu mai le 1982 ina ua pasia e le malo o Muldoon se tulafono na soloia ai se faaiuga a le Privy Council lea na faʻamaonia ai le sitiseni Niu Sila i se vaega o tagata na maua sitiseni ina ua faavaeina e Niu Sila lona lava sitiseni i le 1948.


O lenei pili o le a iloiloina e le komiti filifilia a le malo.


Ae o le mea moni, 'ana le lagolago le Greens i le Labour ma Te Pati Māori, semanu e le pasia.

Fai mai Parmar e manaʻo le ACT e iloilo le pili i luga o le tulaga tutusa ma le saʻo ma le tuʻuina atu i le komiti filifilia o le a maua ai le avanoa e fa'agasolo ai le galuega tele o le iloiloina o lea tulafono taufa'aofi.


Sa lagolagoina fo'i e le Vaega Fa'aupufai a le NZ First ma le latou ta'ita'i ia Winston Peter lea tulaga.


I le lagolagoina o le tulafono taufaaofi, na taʻua ai e le sui taʻitaʻi o le Leipa Carmel Sepuloni, o le tulafono o le 1982 na aveesea ai le sitiseni mai se vaega o tagata.

E le'i faia le sitiseni Niu Sila seia oo i le 1948. A'o le'i oo i lena taimi, o tagata Niu Sila o tagatanuu Peretania;


O le tausaga e 1982 na molia ai Falema’i Lesa, o se sitiseni Samoa o lo’o aumau i Niu Sila i le moliaga o le ova p asp e nofo ai. Sa finau e le'i 'ova ona aso, ona sa ia fai mai o ia o se sitiseni Niu Sila;


O le Tulafono Taufa'aofi e toe fa'afo'i mai ai Sitiseni (Samoa i Sisifo) na ave'esea i le tausaga e 1982, o lona uiga o se tagata na aveese lona sitiseni Niu Sila e le Tulafono o le 1982 o le a agava'a mo le sitiseni e tusa ai ma le sa'o, nai lo le uia o le faiga masani o le nofomau ma le faiga o talosaga sitiseni.


2,513 views

Comments


bottom of page