top of page

Vī'ia ‘e le Perestene Fou o Fanua ma Suafa Galuega lelei a Fepulea'i Atila Ropati.

3 Oketopa 2022

PC: Government of Samoa Facebook Page.


Ua māe'a 'ona fa'atautoina le afioga ia Lesātele Rapi Vā'ai, e 'avea ma Peresetene Fou o le fa'amasinoga o Fanua ma Suafa a Sāmoa.


O le sauniga fa'atautō na faia i le maota o le Ao o le Malo o Samoa i Vailele, ma o le afioga i le Ao o le Mālō o Sāmoa, Afioga Tuimaleali'ifano Va'aleto'a Sualauvi II sa ia fa'atautoina.


Na ‘auai le ta'ita'i o le mālō ia Hon Fiame Naomi Matā'afa, Fofoga Fetalai, Fa'amasino Sili ia Simativa Pereise, Minisitā ‘o le Kapeneta ma le mamalu o le 'au vala'aulia.


Ina 'ua mae'a le lāuga a le afioga ia Lesātele Rapi Vā'ai, na maua le avanoa e saunoa ai e fa'afetaia le tōfiga ua tōfia ai o ia e ta'ita'iina le fa'amasinoga o Fanua ma Suafa a Sāmoa.


I le lauga a le afioga ia Lesātale Rapi Vā'ai, sa ia momoli ai le fa'afetai i lē sa ‘avea ma Peresetene o Fanua ma Suafa, le afioga ia Letufuga Fepulea'i Atila Ropati 'ona o lana fo'i tautua.


Na ia vī'ia galuega lelei sa fa'atino e Fepulea'i i le si'itia ai o le tulaga o le Fa'amasinoga o Fanua ma Suafa 'aemaise ai o le si'itia o le tūlaga ua iai tomai mo ali'i ma tama'ita'i Fa'amasino o le Fa'amasinona.


Saunoa Lesatele Rapi Va'ai,

"E ao lava iā te a’u ona ou ofoina se fa’afetai mo le sa tula’i mai i le tofi Peresetene, le afioga iā Fepulea’i Attila, e le’o po se lilo ua e si’i i luga le lelei o le fa’atinoina ma le fa’agasoloina o galuega a le Fa’amasinoga o Fanua ma Suafa. Ae fa’apea fo’i ona si’itia le tomai o ali’i ma tama’ita’i filifilia i tofi Fa’amasino. E te le’i matamuli e tu’ufesili mai i e sa mua i malae, o au galuega lelei uma sa fa’atino o le a fa’aauau ona fai, ae o le a taumafai fo’i e fa’aleleia atili nisi mea e tatau ona fa’aleleia. Ia fa’amanuia le Atua i lau afioga, faletua ma le ‘āiga."


O Lesātele Rapi Vā'ai ua loa lona silafia i tūlaga tau i Fa'amasinoga, e pei ona sa galue mai ai i le tausaga e 1996 se'ia o'o mai lava i le tausaga e 2017 na mālōlō ai ma aga'i atu i Nauru, peita'i na toe vala'auina i le tausaga ua tuana'i 2021 e ‘avea ‘o se fa'amasino o le Fa'amasinoga Maualuga.


196 views

Comments


bottom of page