E 12 ta'avale itu'aiga o le Lancruiser , pasi ma le loli na foa'i e le malo o Iapani i le Matagaluega o leoleo a Samoa.
O le taeao o le Aso Faraile 2 o Fepuari na tau'a'aoina aloa'ia ai lenei fesoasoani a Iapani e tauala atu i le Amepasa o Senta Keisuke.
O le afioga i le Minisita o Leoleo ia Faualo Harry Schuster ma le afioga i le Komesina o le Matagaluega o Leoleo na taliaina lenei foa'i tele.
Na saunoa le Minisita e fai ma sui o le Malo e molimoli le agaga o le fa'afetai i le foa'i tele a Iapani, e ala i ta'avale e fesoasoani atili ai i le faatinoga o galuega a le Matagaluega o leoleo.
E tusa le $948,000 tupe Samoa le fa'atupega atoa o lenei fesoasoani i lalo o le Polokalame o le Grass-roots Human Security Projects.
I le silasila a le malo o Iapani, e fai sina fa'aletonu o le tulaga tau i seleni a le Matagaluega, ua manatu ai ina ia fesoasoani i lea itu ae fa'aagaaga seleni a le matagaluega mo ni isi vaega taua aua le fa'amalosia o le tulafono.