top of page

$50 afe le fesoasoani a tama ma teine tuai a le Kolisi Samoa i Niu Sila mo le 70 o le a'oga.

Peresetene o tama ma teine tuai a le Kolisi Samoa i Niu Sila ma ni isi o sui o le asosi.


O le taeao nei o le Aso Gafua na fa'ataunu'uina ai le fa'amoemoe a le Kolisi o Samoa e ala lea i le fa'amanatuina o le 70 tausaga talu ona fa'avae mai le a'oga.

O le tausaga e 1953 na fa'avaeina ai le a'oga lenei i Samoa ma sa tau'aveina lava e le malo o Samoa.


O le polokalame i lenei aso, e manatua ai i latou sa fa'avaeina mai le a'oga aemaise o le sao tele o le Kolisi o Samoa i le ta'ita'i o le malo, e ala lea i ni isi sa mamanu mai le atamai ma fofoa mai le ola aoa'oina i totonu o le Kolisi.


O le afioga i le Ta'ita'ifono o le Sosaiete o tama ma teine tuai ia Lealailepule Rimoni Aiafi sa fa'afeiloa'ia le au vala'aulia aemaise o le malo.


Na amata le polokalame i se solo tele sa amata mai luma o le Ofisa o Tineimu ma fa'ai'u mai ai i luma o le fale o le malo i Eleelefou e ui ina malosi timuga i le taeao.


O lea fo'i polokalame na maua ai ma le avanoa e fa'ailoa ai le fesoasoani a sosaiete o teine ma tama tuai o lo'o aumau i atunu'u i fafo e pei ona iai le asosi o tama ma teine tuai i Niu Sila lea sa fofogaina lea e le Peresetene ia Leaupepe Junior Tala'i Lene.


O le fesoasoani a Niu Sila mo le atoaga o le 70 tausaga a le Kolisi e tusa ma le $50,000 tupe Samoa.


O lo'o fa'agasolo polokalame i lenei vaiaso atoa, ma o le 'a maua ai fo'i le avanoa e fa'ataunu'uina ai mafutaga mo 'aiga.


827 views
bottom of page