Ua mōlia ma taofia e leoleo le talavou 19 tausaga le matua, sa ia ave faamalosi se teneitiiti e 7 tausaga lona matua i le Aso Faraile 5 o Aperila 2024, ma faia ai ni amioga matagā.
O le teineitiiti, sa agai ma ona mātua e tafafao i tua o le fale o le mālō i le nofoaga mo tafaoga- Friendship, ae faapea sa savali ese mai le teineitiiti mo se taimi puupuu ma o le taimi lava lenā na leiloa ai.
Sa saili e mātua e lei manuia ma sa fesootai ai loa le Ofisa o Leoleo mo se fesoasoani.
Na taunuu leoleo ma faatino sailiga i lea nofoaga atoa, aemaise o gataifale o Apia. E lei manuia taumafaiga i lea lava pō.
Ae peitai na faailoa mai e le Matāgaluega, o le taeao o le Aso Toonai 6 Aperila 2024, na oo atu ai se aiga mai Matautu Uta ma faaoo atu lenei alualutoto. O le faamatalaga e faapea sa maua e le aiga o tagi i autafa ane o le latou fale i le po o le Aso Faraile lava lea na tau sailia ai pe tusa o le itulā e 10pm.
Sa ave e le 'aiga lenei ma faamoe i le latou fale, ae o le malama ane o le taeao lea ae o latou tau ai i se faasilasilaga i le facebook o tau sailia ai lenei teineititi, ma o lea na o latou faaoo ane ai loa i le Ofisa o leoleo i Apia.
Ua faagasolo ai nei iloiloga a le Matāgaluega e tusa o lea matā'upu ae ua fautuaina ai foi mātua ina ia mataala i le vaai lelei o fanau tamaitai.