top of page

800 harvest bins ma masini mo le fa'aasu na foai e le Pacer Plus mo le aufaifa'atoaga ma le Ofisa Fa'aasu.

Tūsia e Lauano Demetrius Ah Mau/ Ata Pu'eina: Government of Sāmoa.


O le taeao o le asō sa faatinoina ai le sauniga i le ofisa o le Matagaluega o Faatoaga ma Faigafaiva i Atele, mo le taua’aoina o Harvest Bins faapea ma masini mo le vaega o le Fa’aasu e tauala mai i le faigapa’aga a le Matagaluega o Faatoaga ma Faigafaiva ma le fa’alapotopotoga o le PACER Plus i lalo o le faamalumaluga a Niu Sila ma Ausetalia.


O le Afioga i le Laaulialemalietoa Leuatea Polataivao Fosi Schmidt le minisita o Faatoaga ma Faigafaiva, na saunoa aloaia e momoli le agaga fa’afetai i le fa’alapotopotoga e tusa ma lenei agalelei faifaipea mo le au fai fa’atoaga a Samoa.

I le saunoaga a le afioga i le Minisita na ia matua a fa’atāua ai le aoga tele o lenei foai mo le fa’aleleia o auaunaga a le Matagaluega fa’apea ai le si’itia o le lelei o oloa e auina atu mo maketi i fafo, ma o lenei fa’amoemoe o le aogā tele e fo'ia ai nisi o lu’itau ma fa’afitauli olo’o feagai ma le au faifa’atoaga ma le au ave oloa i le feaveai’ina ma le tapenega lelei o fua o fa’atoaga mo le auina atu i maketi i fafo.


I se vaega o le saunoaga a le Minisita, na ia faailoa ai sa agalelei fo’i le PACER Plus i le tausaga e 2022 i le masina o Aukuso lea sa foai ai le 180 o harvest bins, a’o lea ua toe agalelei foi i le isi 800 harvest bins ua 980 ai le aofai o harvest bins ua mafai ona faaogaina nei.


O le foai a le faalapotopotoga a le PACER Plus i le taeao nei e tusa ma le $130,000 tala Ausetalia e tusa lea ma le $253,190 tala Samoa pea faaliliuina i le tupe Samoa.


51 views

Comments


bottom of page