top of page

Amana'ia le tautua a Tilianamua Afamasaga.

14 Tesema 2022.


Gataloaifa'ana Tilianamua Afamasaga.

Ua fa'alauiloa fa'alaua'itele nei i le pepa o fa'amatalaga mai i le Iunivesite Aoao Samoa i le Papaigalagala se fa'ailoga taualoa ua saunia e tu'uina atu lea i le Afioga Gataloaifa'ana Tilianamua Afamasaga.


O le fa'ailoga maualuga o le Doctorate of Letters o se fa'ailoga lea o se fa'aalo po'o le amana'iaina fo'i lea o le tautua matavela a le Afioga ia Gatoloaifa'ana e pei ona sa tautua ma galue ai i le tele o tausaga i le matata fa'afaia'oga.


O Tilianamua na soifua ane i le Aso 5 o Me 1945 ma 'ua 77 nei tausaga le matua o lona soifua.


Sa a'otauina o ia i le Kolisi o Samoa, Hamilton Girls and Christchurch Teachers College ma ia maua ai fa'ailoga o le Tipiloma mo a'oa'oga i le tausaga e 1971.


I le mae'a ai ona faia'oga mo le 5 o tausaga, na auai atu ma a'oga i le Macquarie University i Ausetalia ma fa'amanuiaina ai i le fa'ailoga o le BA Dip-Ed i le 1978. I lona toe fo'i mai ai i Samoa na toe galue ai fa'afaia'oga i nisi o a'oga maualuluga, ae i le 1992 na toe fo'i ai fo'i i le Iunivesite Macquarie i Ausetalia ma toe fa'amanuiaina ai i le fa'ailoga maualuga o le Master of Arts i le Aoga fa'afaiaoga i le 1993.


I le amataga mai o lana tautua fa'afaia'oga , sa galue ai i le Kolisi o Samoa ma le Kolisi o Vaipouli i Savai'i.


O le afioga ia Tilianamua, o se tasi o sui na fa'avaeina le A'oga Fa'afaia'oga i le Iunivesite Aoao o Samoa i le Papa i Galagala i le masina o Iulai 1997.


O le afioga fo'i ia Afamasaga o le Ulua'i fa'auluuluga lea o le Aoga fa'afaia'oga i le Iunvesite a Samoa i le tausaga e 1997 aga'i mai i le 2005, e aga'i ese le afioga ia Afamasaga ua 4 ni polokalame ua fa'apena ona a'otauina i totonu o le a'oga fa'afaia'oga.


E tele le sao o lenei tamali'i o Samoa i tulaga o a'oa'oga ma o se tamali'i e tele ni ona tofiga i fa'alapotopotoga a le malo.


O le tausaga lenei na tofia ai fo'i e le Kapeneta e avea ma se tasi o Komesina o le Ofisa e Pulea Tagata Faigaluega a le Malo.


134 views

Comments


bottom of page