By Lauano Demetrius Ah Mau.
Ua masi’i atu nei le au tenisi a Samoa mo taamilosaga tenisi a le itu lagi lenei o le Pasefika ua taua o le East Pacific Regional Qualifiers e aofia ai Fiti, Toga, Niu Sila ma nisi o atu motu o le Pasefika.
O le motu o Tahiti o lo’o faatinoina ai lenei faamoemoe amata atu i le aso 8 aga’i i le aso 13 o le masina lenei o Aperila 2024, o le fa’agasologa o lenei ta’amilosaga ua na’o ‘au e 2 pito i luga(top2) o le a maua le avanoa e agaa’a atu ai i leisi ta’amilosaga a le Pasefika lava ia i totonu o Fiti o le Pacific Oceania Junior Championship i le masina o Iulai o le tausaga lenei.
Afai ae saofaga uma au tenisi a Samoa mai i lenei ta’amilosaga ona faasauni lea mo le taamilosaga tele a le Pasefika lea e faia i Fiti e saili ai loa se siamupini mo le Pasefika atoa mo ali’i ma tama’ita’i amata atu lava i le 12,16 ma le 18 tausaga le matutua.
E 23 i latou ua filifilia e avea ma ave fu’a a Samoa i lea ta’amilosaga i Tahiti, ma o lo’o i lalo o le ta’ita’i a susuga i faiaoga ulu ia Steffi Thompsen ma Harley Cronin faatasi ai ma le taitai malaga ia Nua Vaai.