Ua taofia ma ua mōlia foi e leoleo le alii avepasi mai Salelavalu, Savaii ina masalomia le faatauina atu o fuālaau faasāina i le taimi o ana faigamalaga.
E tusa ai ma le pepa o faamatalaga mai i le Matāgaluega o Leoleo, o le avepasi e 30 tausaga lona matua ma sa lipoti ane se isi o le atunuu i le Ofisa o Leoleo i Tuasivi.
"O lenei lipoti sa logoina ai le Ofisa o Leoleo i Tuasivi ma taofia ai le pasi ma sailia ai le alii avepasi. Sa maua ai i se tamai ato sa ia tauaveina ni fualaau fa'asaina o le marijuana fa'atasi ai ma ni tagapepa iila laiti o loo iai totonu ni pauta e foliga mai o le aisa. Ua taofia nei e Leoleo i Tuasivi se alii 30 tausaga o Salelavalu i lenei mataupu".
Na faafetaia foi e le Matagaluega o leoleo le lagolago a le atunuu i le lipotiina o soligatulāfoni.
"E fa'afetaia le mamalu o le atunuu o loo lagolagoina le galulue fa'atasi e tafiesea aafiaga o fualaau fa'asaina i tupulaga talavou.
E leai se lumanai manuia pe a fa'amoemoe i fualaau fa'asaina. Tatou tutu fa'atasi e tafiesea lenei mala mai isi o tatou atunuu. A e vaai, pe ete mautinoa foi ni fa'amatalaga i a i latou o loo fiafia i lenei taleni o le fa'atauina atu poo le fa'aaogaina foi o fualaau fa'asaina mai le tatou ofisa i le numera 22 222".