E 8 aso e pogisā, lūlū ai mafui’e, faama’i leai ni fofō ia Samoa pe’ā le usita’ia le fa’aāliga.

O le vaiaso ua tuanai i le aso To’onai 14 ME 2022 na fa’ataunuuina ai ni sauniga fa’apitoa i le Ekalesia Katoliko i Samoa ina ua logoina e le Akiepikopo e ala ise tusi sa ia tuuina atu i le au ositaulaga ma patele o matagaluega taitasi, ina ia fa’atino uma sauniga nei ile Aso Toonai 14 2022.

Ole ‘afuaga o lenei valaau, ina ua logoina ese alii 14 tausaga mai Leauvaa le taitai ole Ekalesia Katoliko I Samoa se fa’aaliga sa ia mauaina.

Mo le silafia i le nei tausaga na molimauina ai ni fa’aaliga mai ile nofoaga o tagata matutua poo le Mapuifagalele i Vaiele, ma se tasi o fa’aaliga i Aleisa ina ua tafe mai suau’u i fofoga o fa’atusa ole tina pa’ia o Maria.

Ae ina i tuana’i na mauaina ai loa e le alii 14 tausaga mai Le’auvaa se isi lava foi fa’aaliga ma fa’atonuina ai o ia ina ia logo le Akiepikopo ia faia le sauniga ile Aso Toonai 14 Me 2022.

Afai ae le fa’atunuuina nei sauniga o le a iai ni mala e o’o ia Samoa i se taimi oi luma, ole’a pogisa Samoa ile 8 aso, luluina mafui’e ile 8 aso ma fa’amai e leai ni fofo ole’a lofia ai Samoa.

Na molimauina le fa’atumulia o nofoaga uma ma faletatalo ale Ekalesia Katoliko i le Aso To’onai i nei Sauniga.

O lenei sauniga sa amataina mai i le 6am i le taeao seia o’o atu i le 3pm, i le afiafi e tusa ai lava ma le fa’aaliga sa tuuina mai i le Ekalesia e tauala mai i se taulealea 14 le matua mai i Leauva’a.

O nai tausaga ua mavae na iai fo’i na fa’aaliga sa tu’uina mai i lenei lava Ekalesia e tauala mai ile tamaitai o Toaipuapuaga Opapo ina ua maua ai ni faailoga o Iesu Keriso i lona tino.

E o’o mai lava i lenei tausaga olo’o mafai lava ona maua e lenei tama’ita’i fa’ailoga nei o Iesu Keriso I lona tino i taimi e fa’amanatuina ai le maliu o Keriso po’o vaitaimi o le Aso Maliu po’o le Eseta.