O loo iai lipoti na taunuu ane i le Ofisa o Leoleo, e faatatau lea i ni tagata o loo faatauina fualaau faasāina i le Maketi i Fugalei.
O le tali a le Matāgaluega o leoleo, na faataunuuina ai se sa'iliga i le Maketi i le Aso Lulu o le vaiaso na te'a e tusa o lipoti na taunuu atu.
E ese mai i lea sailiga, ae sa faatino foi ni isi osofa'iga ma sailiga mo fualaau faasāina e le Ofisa o Leoleo i Faleata i se tasi o fale mautotogi i Tulaele, na maua i lea sailiga ni paipa ma pauta papa'e e foliga mai o le fuālaau faasāina o le 'aisa.
O loo faailoa e le Ofisa o leoleo, e iai le fesootaiga o lea mataupu i sauaga i totonu o 'aiga, ma ua taofia ai se alii 31 tausaga le matua o Fasitoo Uta ma Faleāsi'u.
O le isi sailiga na faatautaia e le Vaega Su'esu'e i Alafua, ma na maua ai paipa e faaaogaina e ula ai le 'aisa, aisa e tusa ma le 4 kalama le mamafa, tupe ma ni pulufana.
E 33 tausaga o le alii ua molia mai i Sinamoga ma Vaimoso ma se alii 38 tausaga o Siuniu ma Alafaua, ma o loo taofia sei aulia le aso 11 o Mati e valaau ai le mataupu i le Faamasinoga.
Ma o loo momoli ai foi le fa’afetai a le matagaluega o leoleo i le mamalu o le atunuu o loo valaau ma ripoti atu mataupu nei, ua tauau ina aafia ai le saogalemu lautele aemaise o le tupulaga lalovaoa o si o tatou atunuu.