5 Tesema 2022.
A'o iai Samoa i le masina pisi ma le fa'atumulia ai o malaga a va'a i le malaga atu ai Savai'i ma le aga'i mai i Upolu.
Ua toe fa'amanatu mai ai nei e le Ofisa o Va'a a Samoa, tūlāfono ma ta'iala mo le saogalemu o tagata ma pāsese o va'a pe 'ā malaga; o nei ta'iala e le'o ni mea fou, ma o le tūlaga lava lea o lo'o fa'amanatuina pea ma fa'amalosia i luga o va'a la'upasese.
Ua fa'ailoa ai nei e le Ofisa Sili o Pulega o Va'a a Samoa ia Leiātaualesā Samuel Decca Phineas le fa'amalosia ona mata'itūina lelei e le ‘aufaigaluega o le saogalemu o tagata faimalaga i luga o va'a.
O le fautuaga malosi lea ua toe fa'amanatu mai, o le tapu ai lea ona toe tōfā se isi po'o le pāsese i lalo ose ta'avale a'o aga'i le faigamalaga i le va'a.
Ona o se fa'alavelave na tula'i mai i le masina na tuana'i, i se tamā na tōfā i lalo o se loli ave uta mamafa lea na solia ai e le loli ma mulimuli ane ai ua maliu.
O le saogalēmū o tagata e maualuga lava i le silasila a le fa'alāpotopotoga ma e mana'omia ai e le afioga i le Pule sili o Va'a le lagolago a tagata o le atunu'u i le usita'ia lava lea o tūlāfono ma ta'iala talafeagai mo le saogalēmū lautele.
I le aga'i atu ai i le fa'ai'uga o galuega o le tausaga lenei 2022 ‘aemaise o Aso Fiafia ua maitauina ai fo'i le tumutumu o tagata malaga i le va ‘o Savai'i ma Upolu.