Nofoaga na maliu ai Tu'u'au Fa'asavalu i Vaitele| Photography by Nah Folasa/Blutv
E o'o mai i le taimi nei o lo'o luga ma lalo mata'upu i le su'esu'eina o le maliu o Tu'u'au Fa'asavalu i Vaitele i le masina o Aperila 2021.
I le 'o'o mai ai i lenei tausaga, sa toe aumai ai i luga faila o le mata'upu lenei ma su'esu'eina mau ma o'o ai ina aga'i ane se tasi o molimau ma fa'ailoa i luga o polokalame fa'asalalau o ia tonu sa iai le mea na tupu i lea aso.
Na o'o le mata'upu i le Kapeneta, ma na fai ai le fa'ai'uga a le Kapeneta ina ia fa'ase'e atu lenei mata'upu mai i le Ofisa o leoleo i le Ofisa o le Loia Sili mo le iloiloina ma le toe su'esu'eina atoa, i lea lava fa'ai'uga e pei ona fofogaina e le afioga i le Sui Palemia ia Tuala Tevaga Iosefo Ponifasio, ua silasila fo'i le malo ina ia aumai ni leoleo su'esu'e fa'apitoa mai fafo ina ia su'esu'eina le mata'upu.
Ina ua fesiligia se tasi o Minisita o le Kapeneta, peita'i sa fa'ailoa o lo'o fa'agasolo pea tulaga masani i aulape uma e tatau ona fa'amalieina mo lea fa'amoemoe i le aumai o leoleo su'esu'e fa'apitoa mai fafo.
O le masina o Aperila 2023 na atoa iai le 2 o tausaga talu ona tupu le fa'alavelave lenei ma o lea ua savali i le 3 o tausaga.
O lenei lava fo'i mata'upu sa laumanu'ia ai ni suafa o sui faipule o le Palemene o Samoa ma ni isi o malu o le malo i se so'otaga iai.
E le'i mae'a fo'i le iloiloga o lo'o feagai ma le Ofisa o le loia Silia e iloilo ma su'esu'e molimau maumaututu o lea fa'alavelave.
Bình luận