top of page

"E le'o le fale 'ae o le 'anofale". Leituala Toelupe Tago.



28 Aukuso 2023: O le aso lenei lea ua tatala aloa'ia ai le vaiaso mo tapenaga a tama'ita'i e to'asefulu ua tapena nei mo le sa'ilia o se tausala o Samoa 2023 i le 2024.


O le sauniga na faia i le Fale Samoa o tagata maimoa mai i Matagialalua na tu'ufa'atasia e le Pulega o Tagata Maimoa mai ma le Onomea Production o le fa'alapotopotoga ua latou fuafuaina ma tapena le Miss Samoa Pageant o lenei tausaga.


O le afioga i le Minisita Lagolago o le Turisi ia Faleomavaega Fuimaono Dickie Tafua sa fai ma sui o le malo e nate tatalaina le fa'amoemoe.


O le avanoa sa fa'atinoina ai ma folasaga aloa'ia a tama'ita'i tauva e to'asefulu a'o tapena ai mo le Aso 9 o Setema i le tauvaga tele.


O le 'auga ma le fa'amoemoe o le tauvaga o lenei tausaga o lo'o ave ai le fa'ataua i le tapenaina lea o le 'ANOFALE' o tama'itai Samoa e ala lea i le fa'atau i o latou tamali'i'aga.


"O le mau tau'ave a le Onomea Productions a'o tau sa'ili ai so matou avanoa e tapena ai le tauvaga mo se tausala Samoa mo le isi 3 tausaga amata atu i le tausaga lenei, e le'o le fale 'ae o le 'anofale, o so matou vaivaiga e mulia'i lava se manatu i le tapenaga o la'ei , o le momosi ma le lalelei o foliga o le tama'ita'i Samoa, ae ia fa'amuamua lona 'anofale, o lona tamali'i'aga, o lona fa'asinomaga, o ona nafatausi, ma lana aganu'u ma lana matafaioi o le malu o 'aiga". saunoaga le fa'atonu o le Onomea Production le afioga ia Leituala Toelupe Tago.


O le manulauti a le Onomea Production ina ia tapu'e le soifua o tama'ita'i Samoa e pei fo'i ona iai le latou polokalame ua fa'avaeina ua fa'aigoa o le Anofale Mentorship Program, o le fa'amoemoe ina ia tapena muamua lava le 'abofale fa'atama'ita'i Samoa ae le'i o'o atu i isi la'asaga. O lenei polokalame ua fa'asolo atu i tua i Nu'u ma Afio'aga ae maualuga lava le silasila i alo ma fanau tama'ita'i.



SUI E TO'ASEFULU UA SAUNI MO LE MISS SAMOA PAGEANT 2023.

Photographer/Videographer: Oscar Mose.



329 views

Comments


bottom of page