31 Ianuari 2023.
O le 'upusi'i a le ali'i lauiloa faimafaufauga o John Donne na fa'aaogaina e le Minisita o A'oga, Ta'aloga ma Aganu'u-Hon Seu’ula Ioane i lana saunoaga autu ina ua usuia le fonotaga fa'aletausaga a faiaoga o le nei tausaga 2023.
Na saunoa le Minisita o le upusi'i a John Donne ua o se fa'amanatu lea mo tagata uma aemaise o le galuega fa'afaia'oga.
"O le upusii lauiloa a John Donne I le fa'asamoa fa'afaigofe “e leai se tagata e tu fa'a-mauga” o se fa'amanatu taua mo tatou uma."
"O le fa'ataua o lo'o ave i le galulue fa'atasi o se itutino e tasi e mafai ai ona fa'aosofia ma galulue fiafia i tatou uma aua le lumanai. O lona uiga, o tatou uma i le Matagaluega, Puleaoga, faiaoga, matua, komiti o aoga ma tagata uma e manaomia le galulue o se auaiga/itu tino e tasi ae tu'u le fa'asinosino lima i leisi ma leisi ma e le tauilo le ausia o fa'amoemoega mo taunu'uga lelei mo aoga uma i Samoa."
I le fiafiaga o le Minisita o Aoga ia Seuula Ioane ona o le mafai ona auai uma o pa'aga tau a'oa'oga i le mafutaga e toe fa'amautuina la latou ta'utinoga e fa'aleleia ma fa'amalosia 'auala o fa'atinoga tau a'oa'oga, e ala lea i le toe tapu'e ma apulupulu galuega o i latou taito'atasi i le tausaga fa'alea'oa'oga 2023.
O le autu o le fonotaga o le lenei tausaga-"O le galulue fa'atasi e 'ausia ai fa'amoemoega 'uma", ma ua fetaui lelei ma le faigamalaga a faia'oga ina ia tatau ona galulue felagolagoma'i o se itutino e tasi".
O le fa'amoemoega a le ali'i Minisita e na'o le pau lea o le 'auala e mafai ai ona fa'amautinoa le sini mo le lelei o a'oa'oga e tu'uina atu i fanau uma e tusa lava po'o fea e a'oga ai.