E le galo i tagata o Samoa le aso lenei i le tausaga e 2009, ina po'ia fa'aofaga o manu le itu i sasa'e o le atunu'u i galu malolosi i le taeao o le Aso Lua a'o tau totogo malama o le aso fou.
O le tausaga lenei ua atoa ia le 14 o tausaga talu ona a'afia Samoa i le Tsunami na fasiotia ai le silia ma le selau o tagata Samoa aemaise o tagata maimoa mai sa apitaga i faletalimalo i le atu Aleipata.
E fa'atusaina i le 10 futu le maualuluga o galu ina ua fa'ato'a mae'a lava ona luluina le mafui'e e tusa ma le 8.1 lona malosi i le fua mafui'e.
O le Aso 2 o Oketopa 2009, na tu'uina mai ai se lipoti a Ofisa na faia fa'amaumauga o lea mala fa'alenatura, na o'o atu ai le faitau aofa'i o tagata ua leai ni fale e nonofo ai i le 3000.
E 'o'o ane i le aso 30 o Setema o le tausaga lava lea 2009, ua gaogao le 'a'ai o nu'u ma itumalo na aafia ua aga'i uma i nofoaga maualuluga.
I le ufitia ai o Samoa i le ao pogisa ona o lea fa'alavelave fa'alenatura sa gasolo mai ai fesoasoani a atunu'u ese'ese o le lalolagi e lagolago ai mafatiaga o 'aiga.
O le tausaga muamua talu ona mae'a le Tsunami, sa fa'atautaia ai se sauniga fa'alemalo e manatua ai pea lea Aso Pogisa na a'afia ai Samoa ma ona tagatanu'u.
I le o'o mai ai i lenei taimi, e ui ua le'o toe iai ni sauniga aloa'ia e fa'amanatu ma manatua ai soifua o i latou na fano, ae ua iai suiga ua faia e le malo e fesoasoani i tagata mo sauniuniga pe 'a o'o ina lata mai ni isi mala fa'alenatura.
Ua fa'apipiina sailino ma fa'ailoilo, e tata pe 'a o'o ina fautuaina le atunu'u e aga'i i nofoaga maualuluga ae le gata i lena ua to'atele le mamalu o le atunu'u ua tu'ua o latou fanua sa iai i le 'a'ai ae aga'i i nofoaga maualuluga.
O lo'o galulue pea ta'ita'i ma le malo o Samoa e fainauina mata'upu mo fofo talafeagai e fesoasoani atu ai i a'afiaga ma'ale'ale o suiga o le tau.