top of page

"E tatau a ona toe iai se tatou va'alele". Minisita o Tupe.



Ua fa'ailoa manino e le afioga i le ali'i Minisita o le Matagaluega o Tupe i luga o le Polokalame ale E.F.K.S T.V, le afioga ia Lautimu'ia Uelese Afoa Va'ai; o le taimi nei ua tatau ona toe fai se va'alele a Samoa.


O le silasila a le afioga i le Minisita ma lona talitonuga, e pau lea o le auala e fesoasoani ai i le tama'oaiga o le atunu'u aemaise o faiga fa'atauvaga o lo'o iai nei i va'alele ma le tulaga gafatia o pasese.


Fa'aalia manino e le afioga ia Lautimu'ia, o le aoga o le iai o le va'alele a Samoa e fesoasoani tele lea i atina'e o Turisi e malaga mai i le atunu'u.


Peita'i, o lo'o manino i lana saunoaga i le tatau ona ave le faamuamua mo le tuuitiitia o aitalafu, ma o se tulaga lelei tele lea i lona tulai mai o lea ua faaitiitia aitalafu ma ua manatu o se taimi talafeagai ua tatau ona toe fai se vaalele a Samoa lava ia.


Na ta'ua e le Minisita le malo a Fiti ma le taumafaiga o lo'o tumati'e, i 'au'aunaga tau va'alele aemaise o faigapa'aga talafeagai ma o se tasi lea o itu ua tatau ona silasila iai le malo o Samoa, ina ia mafai ona faia ni faigapa'aga ma ni isi o va'alele.


Saunoa fo'i le afioga ia Lautimu'ia, a fai ae fai se va'alele a Samoa ma lelei lona fa'atautaiga; o le 'a mafai ona fesoasoani i le tu'uitiitia o pasene o aitalafu a le atunu'u.


O le saunoaga a le afioga i le ali'i Minisita o Tupe, o le mea pito sili ona taua; ia mafai ona fai se va'alele a Samoa lava ia i se taimi e talafeagai.


Ua silasila toto'a nei le afioga i le Minisita, i lenei poloketi mo le atunu'u aemaise o le tama'o'aiga o Samoa.


Ua fa'ailoa fo'i, o le 'a soa le pule i lana Matagaluega aemaise o le afioga i le Minisita o Va'alele.

1,418 views

Komentarze


bottom of page