top of page

Fa'aauau na foa'i se faifa'ato'aga ‘ile Mapuifagalele.

24 Oketopa 2022


E le'o iai se va'ai fa'asi'umata i le ali'i faifa'ato'aga o le atunu'u ia Fritz Ala'iasa i lona agaga foa'i atu ile Maota o Tagata Matutua le Mapuifagalele e pei ona fa'aauauina ai pea lenei matafaioi ole foa'i atu lea o fua o le ele'ele mai lana fa'atoa'ga aua le maota mo tagata matutua i Vailele.

O le vaiaso na te'a na uta ai le ta'avale a Fritz, i fua ole fa'atoa'ga e pei o Esi, Kapisi, Kukama ma isi fuala'au 'aina faisua e molimoli atu lea i le Mapuifagalele e fesoasoani ai lea i tama'ita'i Sa o lo'o tausia nai tina ma tama matutua i lea nofoaga.

I le fa'atalanoaga a le Bluwave ma le susuga ia Fritz na ta'ua ai e lenei tamali'i, o le tagata e 2019 na 'amata ai lana lea matafaioi 'ina ua a'afia Samoa i le Koviti 19, i le mo'omia tele o vaega mo taumafataga a nai matua tausi i lena taimi sa ia manatu ai loa, o se taimi lelei lea ole'a ia foa'i atu ai fua o ana galuega mai i le lau ele'ele e tu'u atu aua se fofoga taumafa a nai matua tausi.

O se fa'aosofiaga lelei tele mo le susuga ia Fritz ma si ona faletua ma le fanau aemaise ai nai ona 'aiga.

Na molimau mai le tama ia Fritz i fa'amanuiaga a le Atua o lo'o maua pea e si o la'ua 'aiga 'ona o lenei galuega o lo'o faia pea i masina ta'itasi.

O le susuga i Fritz o lo'o alala ma si ona 'aiga i Vaivase ma o lo'o atina'e ai lo la'ua 'aiga ma fesoasoani ai i le nofoaga o le Mapuifagalele.


383 views

Commenti


bottom of page