By Lauano Demetrius Ah Mau.
I le maea ai o le ta’aloga mulimuli a le Manu Samoa 7’s ma le ‘au a le Puma mai Argentina sa matua faato’i lalo ai e Argentina le ‘au ta’ito’a fitu a Samoa i ‘ai e 42 i le leai o se ‘ai a Samoa, na maua ai le avanoa o sui o le blutv(Sport Talanoa) sa auai atu i Hong Kong e fa’atalatalanoa ai le
faiaoga ulu o le Manu Samoa 7’s le susuga ia Muliagatele Fata Brian Lima.
Na momoli le agaga fa’afetai o Muliagatele i le tapuaiga a Samoa e le gata i Samoa nei a’o le lagolagosua atu a tagata Samoa o lo’o aumai i Hong Kong a’o iai le ‘au i le fa’agasologa o le ta’amilosaga amata mai lava i le aso Faraile seia faamea i le aso Sa ua mavae atu.
Saunoa le faiaoga ulu e ui ina le tau lau o le fa’amoemoe i le taumafaiga a alo ma fanau sa tauaveina le ‘au a le atunu’u, ae sa taumafai lava ia ausia le tulaga maualuga e tatau ona iai le ‘au ta’ito’a fitu. E tele lava ni vaega o le ‘a galugalue ai le pulega i le toe fa’aleleia ma le gasologa lelei o le faatinoga e tama ta’aalo o le ta’aloga i nisi o vae o lo’o totoe o le ta’amilosaga ta’ito’a fitu a le lalolagi(HSPC SEVENS).
Ua na’o le tasi lava le ta’aloga a le Manu Samoa 7’s na malo ai aae le’i manuia taumafaiga i le tele o ta’aloga mai lava i ta’aloga o pulu(pool games).
O le a ua sola ai nei ma Niu Sila le siamupini o le ta’amilosaga i Hong Kong i lenei tausaga 2024 ae ua fa’atulaga mai ai Samoa i le tulaga 11 i le fa’atulagaina o au ta’ito’a fitu a le lalolagi ina ua maea lenei ta’amilosaga.