top of page

Fa’amaise le Peresetene a le Asosi Tusitala Samoa i le maliu o le pule a le TV3.

Ianuari 24, 2023.


Aotearoa Pesamino Mayer

O lo'o iai nei le ao pogisa i le Pulega a le TV3 Samoa ona o le maliu fa'afuase'i ai o le latou pule le susuga ia Aotearoa Pesamino Mayer i le Aso Gafua 23 Ianuari 2023 i lona maota.


Ua le gata o le pulega a le TV3 ae ua f

a'apena fo'i i le 'aiga fa'asalalau a Samoa atoa ona o le tala fa'anoanoa sa mauaina i le amataga o le vaiaso lenei.

Na tu’uina mai se fe’au fa’amaise a le afioga i le Peresetene o le Asosi Tusitala ma le ‘Au Fa’asalalau a Samoa le susuga ia Lagi Keresoma mo le tama’ita’i o Aotearoa.


“E talitonu e leai se isi o le tatou fa’alapotopotoga e le’i fa’ate’ia i le tala fa’anoanoa, o le toesea o se tasi o uso po’o se tuafafine fo’i. O Aotearoa o se tagata galue ma o se ta’ita’i fo’i e le mana’o e fa’aletonu se mea”

Na ta’ua foi e Lagi, o le susuga ia Aotearoa sa ia mauaina le avanoa i se fonotaga fa’alea’oa’oga e faia i Sigapoa i le masina o Fepuari ae peita’i o lenei ua fa ii lagi lana faigamalaga.

“Mo a’u e lagona lava le fa’anoanoa ona o Aotearoa na fa’amanuiaina lana applications e auai i se fonotaga fa’alea’oa’oga mo le vaega tau maketi(Media & Marketing ) e faia i Sigapoa i le masina fou”

Ua momoli mai ai se fe’au fa’amafanafana fa’alaua’itele a le afioga i le Peresetene o le Asosi a Tusitala i le Pulega a le TV3 aemaise o ‘aiga o lo’o tagi mai i ala ona o lenei tala fa’anoanoa.

Na logoina e le Fa'atonu o le TV3 le afioga ia Maposua Corey Keil lana aufaigaluega o le pule o le TV3 ua maliu.

O se tala sa talia gata ma talitonuina e le aufaigaluega ona o le tama'ita'i e malosi ma e le'i fa'ata'otolia fo'i i se gasegase.

O le taimi nei ua fa'agasolo su'esu'ega a le Ofisa o Leoleo ona o lea ua masalomia o se mata'upu tau fasioti tagata na mafua ai ona maliu le susuga ia Aotearoa.

O Aotearoa o se tama'ita'i e tauagafau ona uiga i le 'aiga fa'asalalau a Samoa, ua molimauina ai nei i luga o upega o feso'otaiga ia fa'amaisega ma lagona o le misia o le toatele o tagata ona o lenei tama'ita'i e iai lava i so'o se mea.

E avea lenei taimi e momoli atu ai fa'amaisega mai i le Pulega a le Bluwave Media i le Aiga fa'anoanoa aemaise o uo ma e mamae o le susuga ia Aotearoa Pesamino Mayer.


771 views

留言


bottom of page