Fa’amanino ‘e le Manaia Event tu’ua’iga i fa’ailoga o le Miss Samoa.

16 Setema 2022

Ua manino ‘au o fala i se fesili na tula’i mai ina ua mae’a le tauvaga tele o le sailiga o se tausala o Samoa 2022-2023 e pei ona sa fa’atautai ‘ese fa’alapotopotoga iai le agava’a mo le tapenaina ma le fuafuaina oni faamoemoe ma sauniga tetele le Manaia Event.

O le ‘uma ai le tauvaga ae manu ane ni fa’agau lē malie a nisi o komiti o isi sui tauva na tausinio i lea tauvaga i tulaga i fa’ailoga sa mauaina lea e tama’itai tauva.

O nei tu’ua’iga sa faitioina ai le fa’aletonu o fa’ailoga na maua e isi o sui tauva e le’i ausia le fa’atumutumuga o le tausinioga aemaise o fa’ailoga lea tau i seleni.

O le feiloa’iga a le Blutv ma le ta’ita’ifono ol e Manaia Event ia Leiataualesā Asiata Tāi’i Jerry Brunt, na ia fa’amanino ai nisi nei o vala e tali atu ai i nei tu’uaiga po’o ni atugaluga na fa’aali atu e ni isi o le atunuu.

Saunoa manino Leiataualesa, o fa’ailoga ma fa’amanuiaga o le sa’iliga o le tausala o Samoa i tausaga ‘uma e mulimulita’i lava i taiala ma fa’asinomaga e tu’uina atu lea ‘e le Ofisa o Turisi ma o le faiga lava lea sa sau a’i le tele o tauvaga ua tuana’i.

O fa’ailoga tau seleni o vaega ia o lo’o tu’uina mai lava e le Ofisa o Turisi le maualuga o fa’ailoga seleni e mauaina ese tama’ita’i manumalo pe’a mae’a le tauvaga.

O isi fa’ailoga e pei o seleni ta’i $300 mo se fa’ata’ita’iga sa mauaina e ni isi o tama’ita’i tauva, o vaega ia oni fesoasoani mai nisi o pa’aga lagolago(sponsors) sa ‘aisi ma talosaga iai le Manaia Event ina ia fesoasoani mai i fa’ailoga.

O lona uiga ‘afai lava la o le’a tu’uina mai e le pisinisi se pepa tala’oloa po’o se seleni fo’i mo lea lava le vaega o le tauvaga, o le fa’ailoga lava fo’i lena e tu’u sa’o atu lava i le tagata e tatau ona alu iai.

Saunoa le ta’ita’ifono o le Manaia Event, e le’o iai lava se tulaga e fa’anoanoa ai pe le fiafia ai ona oni faitioga ae e taua fo’i ma aoga mo le lumana’i ina ia matua sa’ili ni fa’ailoga mo lenei tauvaga aua alo ma fanau o le’a tauvava, ma e talitonu le ta’ita’ifono sa o latou taumafai lava i le mafai ina ia tele ma lava ni fa’ailoga mo lea tauvaga ‘aepeita’i e silafia a’afiaga feagai ai ma Pisinisi lenei vaitau ona o a’afiaga lea o le Koviti 19.