Fa'asopolia Samoa atoa i le sulu o le Filemu.

Photo by: Nah Folasa| Blutv

O le taeao nei o le Aso Faraile 10 Novema 2023, na sopo mai ai i Mulinuu le 'Sulu o le Filemu' o lo'o taulamua ai le To'omaga mo e Puapuagatia.

Ua 2 vaiaso o fa'agasolo le sulu lenei, ma sa malaga atu fo'i i le Motu o Savai'i; o le fa'amoemoe ina ia molimoli atu le fe'au i 'aiga uma o le atunu'u ina ia taofia le sauaina o tina ma tama'ita'i aemaise o fanau.

Sa talisapaia e 'aiga ma nu'u lenei fa'amoemoe a le To'omaga Mo e Puapuagatia, ona o le talitonuga o se fa'ama'ite ma o se fa'amoemoe lelei lea e fa'amanatu ai i 'aiga ta'itasi a'afia o latou o lo'o sauaina i so'o se sauaga.

O le afioga i le Peresetene o le Fa'alapotopotoga ia Siliniu Lina Chang, o lo'o taulamua i le taitaiina o lenei 'Sulu'.

O le taeao nei, lea na malaga mai ai lea 'Sulu' ma aga'i i Mulinu'u; ma maua ai le avanoa e asia le fale fa'amasino. Sa aga'i ane afioga i Fa'amasino o le Fa'amasinoga Maualuaga ma Fa'amasino o Fa'amasinoga o Soligatulafono e fa'afeiloa'i le To'omaga aemaise o se latou saunoaga e uiga i le taua o lenei fa'ama'ite lelei.

Ua fa'amauina le fa'atupula''ia pea o tagata o lo'o sulufa'i i le Nofoaga lenei o le To'omaga mo e Puapuagatia ona o le tula'i mai pea o Sauaga ese'ese i 'aiga ma ua le malu ai i o latou lava loto'ifale.