O le taeao o le Aso Gafua 29 Aperila 2024, sa faatautaia ai le faatautoga o le Afioga i le Peresetene Lagolago, le Afioga ia Faumuina-Le-Tupufia Opapo Soanai Oeti.
O Faumuinā Le Tupufia ua loa tausaga o lana tautua mo Samoa i ni isi o Matāgaluega a le Mālō ma pisinisi a Samoa.
O le masina o Setema i le tausaga 2019, na filifilia ai le Faamasino Lagolago e avea ma Faamasino o le faamasinoga o Fanua ma Suafa a le atunuu se'ia tau mai i lenei tausaga 2024.
O lona soifua galue sa amata mai ile tausaga e 1977 ma e:
- 13 tausaga o faigaluega i Kamupani faapea Ofisa a le Malō e pei ole Faletupe o Atinae, Agriculture Store Corporation Savaii ma isi;
- 22 tausaga o avea ma Faifeau Tausinuu mo Le EFKS Siufaga Falelatai;
- 5 tausaga o tautua e ala i lona tofiga Faa-Faamasino o le Faamasinoga o Fanua ma Suafa ma o lea ua faaauauina ai i le avea ai ma Peresetene Lagolago.
Na momoli le faamalō a le Matagaluega o Faamasinoga ona o le tautua mālō a le afioga ia Faumuinā Le Tupufia, ua le gata o le atunuu, o le nuu ae o 'āiga ma le Elalesia.