top of page

Fa'atino sauniga i le nofoaga na maliliu ai fanau a le atunuu i Vitolia e le Fono o tagata Samoa.



O le fa'ai'uga o le vaiaso na te'a, na faia ai se sauniga i le nofoaga na lavea ai le ta'avale sa malaga ai ni alo o Samoa ma maliliu ai i Vitolia, Ausetalia.


O lenei sauniga na fa'ataunu'uina i lea nofoaga, e sui o le fono faufautua o tagata Samoa i Ausetalie, o se sauniga e manatua ai i latou ua maliliu i le fa'alavelave.


O teu fugala'au ma koluse o fa'ailoga o le fa'anoanoa na tau'a'aoina atu i lea nofoaga o le atunu'u.


E silia ma le 2 itula le mamao o le nofoaga na malaga ane ai le fono o tagata Samoa i le vaega tonu na tupu ai le fa'alavelave, o le fa'amoemoe ina ia momoli fa'amaisega i 'aiga ma uo aemaise o le manatua o nei alo o Samoa.


O le vaiaso fo'i ua tuana'i, sa fa'alauiloa aloa'ia ai e le afioga i le Minisita o le Matagaluega o Tupe po'o le fa'auluuluga o Galuega Fa'avaitaimi ia Lautimu'ia Uelese Afoa Va'ai; ua galulue nei le malo ina fa'atino tulaga uma mo le toe fa'afo'i mai o tino maliliu o nei alo o le atunu'u mo latou toe sauniga i 'aiga.


O suafa ma fa’amatalaga nei e patino i nei alo o le atunu’u na a’afia i lenei fa’alavelave fa’afuase’i;

1. Apera’amo Tapelu mai le afio’aga o Letogo, Upolu. E 24 tausaga le matua o le soifua. 2. Alesana Anitele’a mai le afio’aga o Safotu, Savai’i. O se tamā e 34 tausaga le matua o le soifua ma ua fai le ‘āiga, e to’atasi si ona alo. 3. David Atonio Gasologa mai le afio’aga o Falefā, Upolu. E 27 tausaga le matua. 4. Darrick Amouta Peleti mai afio’aga o Lufilufi ma Falevao, Upolu. E 28 tausaga o le soifua.



479 views
bottom of page