Alii ma faipule o Afega i le feiloa'iga ma le Matagaluega o Leoleo.
Ua mae'a ona fai le feiloa'iga a le pulega a alii ma faipule o Afega ma le Matagaluega o Leoleo e tusa o ni mata'upu o lo tulai mai i le latou va ma Le'auva'a.
O le feiloa'iga sa fa'ataunu'uina i le amataga o le vaiaso, Aso Gafua 15 Ianuari 2024 i le nuu o Afega.
O le fa'amoemoe ma le 'a'ano moni o le nei feiloa'iga, ina ia tausia pea le filemu i nuu e lua o Leauvaa ma Afega aemaise o le malu puipuia o tagata o nei nu'u.
O mata'upu i fanua o Afega lea sa nofoia e tagata Le'auva'a o le afuaga lea o ni vevesi i galuega o lo'o fa'atino nei ma ua manatu ai le Matagaluega o Malu o le Malo ina ia savalia nei afio'aga mo le tausisia pea o le saogalemu.
O le ta'ita'i leoleo sinia ia Tua'ena Lomano Paulo le vaega o Galuega Soosootauau ma le Atunuu (Community Engagement Unit) ma ni isi o Taitai Leoleo Asiasi sa fai ma sui o le Matagaluega i lenei feiloaiga tāua.
Ua le'o na ma le laina le tula'i mai o vevesi ma ata ua fa'asa'a'auina i upega o fesootaiga ona o le salalo a le nuu o Afega o lo'o fa'agasolo i o latou fanua sa nofoia e tagata Le'auva'a ma ua o se tulaga ua oia ai le nofo filemu o nei nuu.
Sa fa'afetaia e le Matagaluega o Leoleo, Falepuipui ma le Toefuata'iga pulega a alii ma faipule o Afega i le latou lagolago i le galuega fa'atino a le Matagaluega aua le tausia o le nofo filemu i totonu o nuu ma afio'aga aemaise o totonu o Samoa atoa.