Ua faamaonia e le Lakapi Samoa le filifilia ai o le susuga ia Mase Mahonri Schwalger e avea ma faiaoga ulu o le aulakapi Manu Samoa 15.
O lea faaiuga sa faia ina ua māe'a le filifiliga sa faia e fua i talosaga mo lea avanoa, ma sa fautuaina ai e le laulau sa faatinoina le faatalanoaga ina ia tofia ma filifilia Mase, ma o lea na faamaonia ai e le komiti faatonu o le Lakapi Samoa lea tofiga.
E fa(4) tausaga lea ua filifilia ai Mase e amata mai i le tausaga nei 2024 se'ia pā'ia le 2027 ma taualuga ai i le Ipu o le Lalolagi.
Sa faafetaia e Mase le tofia ai o ia e avea ma faiāoga ulu o le au tele a le atunuu.
O le susuga ia Mase, o se tasi o alo poo tamālii sa ia taalo mo le Manu Samoa 15 ma sa avea foi ma kapeteni i lona vaitaimi.
O Mahonri, ua suitulaga nei ia Vaovasaomanaia Seilala Mapusua sa tauaveina le tofiga faiāoga mo le Manu Samoa.
O loo umiaina le suafa Mase mai Saleaula, ua faaipoipo ia Molly ma e tasi lona afafine.